Bi milioi eta erdi euro inguruko aurrekontuarekin, eraikina 2015ko udaberrian martxan egongo dela aurreikusi du Jon Etxeberria Osakidetzako Zuzendari Nagusia
Aurreko ostiralean hasi zituzten Zumarragako Ospitaleko eraikin berriaren lanak. Eraikinak kanpo kontsultak hartuko ditu, 30 guztira. Ospitaleak aspaldi duen behar nagusiari erantzun dio proiektuak, espazio faltari, alegia. Jon Etxeberria Osakidetzako Zuzendari Nagusiak “historikotzat” jo du eraikin berriaren eraikuntza, “gaur egun aurrekontuak mugatuak baitira eta eraikin bat egitea ez da eguneroko gauza”.
Proiektuak bi milioi eta erdi euro inguruko aurrekontua du. Lanak 2014ko abenduan amaituta egongo direla aurreikusi du Etxeberriak, eta martxan 2015eko udaberrian martxan jarriko dutela. Teresa Garmendia Ospitaleko Osasun Erakunde Integratuko kudeatzaile berria da, dioenez, “ospitaleko profesionalekin bilerak egingo ditugu zerbitzu bakoitzak dituen beharren berri izateko, horren arabera eraikin berrira nortzuk doazen erabakiko dugu”.
Eraikin berriaren beste helburua egungo eraikinean tokia egitea da. Beste ebakuntza gela bat egiteko asmoa daukate gerora, baita bizkortzeko gune berria.
