Z-Z Urolako Trena Bizikletaz martxaren bederatzigarren aldia izango da; hiru ibilbide izango dira aukeran.
Z-Z Urolako Trena Bizikletaz ekimenaren bederatzigarren aldia egingo dute larunbatean Urretxun eta Zumarragan. Goierri kirol elkarteko zikloturista taldeak antolatutako bizikleta martxa da, «familia guztiari» zuzenduta dagoena, Anjel Etxezarreta zikloturista taldeko arduradunak esan duenez. Bailaran bizikletaren erabilera sustatzea eta «familia giroan goiz aparta» igarotzea dira ekimenaren helburu nagusiak.
Urtero bezala hiru ibilbide izango dituzte aukeran parte hartzaileek, gaur egun bidegorria den eta Urolako trenak garai batean egiten zuen bidetik barrena. Urretxu-Zumarragatik irten eta Lasaora artekoa izango da luzeena, «58 kilometro guztira». Azkoitira bitartekoa da bigarren aukera 28 kilometroko bidea osatuta eta Aizpurutxora artekoa da motzena, 14 kilometro guztira.
Irteera Areizaga-Kalebarrenen
Bi irteera ordu jarri dituzte antolatzaileek «aukeratzen den bidearen araberakoa». Lasaora arte joan nahi dutenak 9:30ean irtengo dira Areizaga-Kalebarren plazatik, eta gainerakoak berriz, 10:00etan leku beretik. Amaieran hamaiketakoa eskaini diete antolatzaileek parte hartzaile guztiei. Proban parte hartzeko beharrezkoa izango da aldez aurretik izena ematea. Horretarako «Urretxuko Aldiri eta Zumarragako Ispilla kiroldegietan eskura dauden txartelak bete» eta larunbat goizean martxa hasi aurretik aurkeztu beharko zaizkie antolatzaileei dortsala eskuratzeko. Txartelak larunbatean bertan betetzeko aukera ere egongo da.
