Egingo dituzten aldaketen artean, bidai-txartelaren prezioa 10 eurotik 3 eurora jaitsiko dutela iragarri dute.
Irailetik martxan dagoen Auzobusa autobus zerbitzua hobetzeko asmoz, hausnarketa prozesua burutu berri du Urretxuko udalak. Prozesu honetan ekarpenak urretxubiziz.com web gunearen bitartez, herrian zehar jarrita dauden postontzietan, bi auzotan herritarrekin egin diren bileretan eta batzar ireki batean bildu ditu udalak.
Herritarrek egindako proposamenak aintzak hartuta, zenbait aldaketa egingo dituzte Auzobusa zerbitzuaren gainean. Helburuak bere horretan jarraituko du, auzoek jarraituko dute lehentasuna izaten, eta auzotarren artean pertsona nagusiek, irisgarritasun arazoak dituztenek eta haurrek. Helburu honi, kotxearen erabilpena murriztearena gehituko zaie.
Bonoari eta prezioei dagokienez, txartela doan eskuratzeko gutxieneko adina 70 urtetik 65 urtera jaitsiko dute. Zerbitzua doan izaten jarraituko dute bost urtetik beherako haurrek eta mugikortasun arazoak dituztenek. Multzo honetara %65etik gorako ezgaitasun psikikoa duten pertsonak ere sartuko dira.
Bonoaren prezioak behera
Gainera, bidai-txartelaren prezioan ere izango da aldaketarik, hamar bidaietarako txartelak 3 euro balioko ditu aurrerantzean, orain arte 10 eurotan saldu da. Bidai-txartel hauek ez dute iraungitze datarik izango. Ibilbideak berdina izaten jarraituko du, baina badira kontutan hartzeko zenbait aldaketa. Eguneko lehen eta azken orduko bidaietan Auzobusa ez da Santa Barbarara igoko. Goizean, 7:40ean Mundo Mejorretik Apariziora joango da zuzenean. Bueltan, Apariziotik Labeaga 30era egingo du, Mundo Mejorrera igo eta kanpoko bariantetik jaitsiko da Basagastiraino.
Ordutegian ere badira aldaketak, 19:05etako zerbitzua desagertu egingo da. Horren ordez hiru berri gehituko dira, 18:00etan eta 20:00etan eta larunbatetan 12:20ean. Aldaketa guztiak etzi jarriko dira martxan. Etorkizunari begira, zerbitzua Zumarragarekin batera ematea da asmoa.
