Erregu eta galderen atalean sortu zen eztabaida; gainerakoan gai zerrendako puntu guztiak onartu zituzten.
Egin berri da Urretxuko udaletxean azaroko osoko bilkura. Gai zerrendan aurreikusita zeuden puntu guztiak onartu ditu udalbatzak. Bilkura lasai joan da, baina erregu eta galderen atalean eztabaida sortu du hondakinen eta errauskailuaren gaiak PSE-EE eta Bilduko ordezkarien artean.
Pasa den astean Urretxuko PSE-EE alderdiak Javier Martin ordezkariaren izenean errauskailuaren inguruan publiko egindako prentsa ohar bat izan zen eztabaidaren sorburua. Prentsa ohar horretan, Martinek, besteak beste adierazi duenez, «urretxuarrek 93.231 euro ordaindu beharko dituzte hondakinen tasen bitartez» Gipuzkoako Foru Aldundiak errauskailua egiteko proiektua atzera botatzeagatik.
Unai Badiola Bilduko ordezkariak datu horiek nondik atera dituen galdetu zion Martini, berak zituen datuekin «kontuak ez zitzaizkiola berdin ateratzen» argudiatuta. Martinek datuak «fidagarriak» direla erantzun zion, eta «nahi dutenean gaia argitzeko prentsaurreko bat» emateko gonbidatu luzatu zion Bilduri.
Datuen arteko dantza
Badiolak, Martinek bere galdera ez zuela erantzun nahi ondorioztatu zuen, eta errauskailua egingo balitz «urretxuarrek guztira hiru milioi eurotik gora» ordaindu behar izango zituela esan zuen. Martinen izenean publiko egindako oharrarekin jarraituta, PSE-EEk Bildu eta EAJ erantzule egin ditu izandako jokaeragatik.
Horri erantzunez, Badiolak «EAJk eta PSE-EEk errauskailuaren gaiaren inguruan» asko dutela esateko erantzun zion. Bilduren erabakia ekonomikoki «gure onurarako» izan dela esanez. Horrekin batera «Bilduk ez duela herritarrengan pentsatu diozunean, oker zabiltza» esan zion Martini. Bilduk errauskailua atzera botatzeko erabakia, hain zuzen «herritarren osasunean eta ingurumenean pentsatuz» hartu duela argudiatuz.
Oihane Zabaleta alkateak PSE-EEk emandako datuak «ez direla fidagarriak» esan zuen. Demagogia «merkea» egitea leporatu zion Martini eta orain arte aurrera eraman dituzten politikak «negargarriak» izan direla ondorioztatu zuen. Hortik aurrera eztabaida gehiago berotu zen, gardentasun faltaz hitz egin zuen Martinek eta gaiarekin zerikusirik ez zuten zenbait gai atera zituen.
Bi adierazpen instituzional
Gainerakoan, azaroaren 25 eta abenduaren 3aren inguruko bi deklarazio instituzional onartu zituen udalbatzak. Lehenengoa aho batez, eta bigarrena Bildu, EAJ eta H1!en aldeko botoekin. Energia elektrikoaren kontratazioa ere onartu zuen udalbatzak, hau ere aho batez.
