Saridunen artean bera da goierritar bakarra; Amaia Iturriotzek aipamen berezia jaso du bertsopaperen atalean.
Urretxuko eta Zumarragako udalek antolatzen duten Bertsopaper, Narratiba eta Poesiako Iparragirre sarien irabazleen izenak jakinarazi berri dituzte. Saridun guztien artean goierritar bakarra dago aurten, Alex Areizaga zumarragarra, euskarazko narratiba sailean. Saririk irabazi ez badu ere, Amaia Iturriotz urretxuarrak aipamen berezia jaso du bertsopaperen atalean.
Gainerakoan guztira 211 lan jaso dira aurten Iparragirre sarietan. Bederatzi lan bertsopaperen sailean, 155 lan narratibaren atalean, horietatik hamabost euskarazkoak eta 140 gaztelaniazkoak. Poesia sailean 47 lan jaso dituzte orotara, 6 lan euskaraz eta 41 gaztelaniaz.
Bertsopaperen sailean, hutsik geratu da 16 urte arteko mailari dagokion 100 euroko saria, lanik ez delako aurkeztu kategoria honetan aurtengoan. 16 urtetik gorakoenean bildu diren 9 lanen artean Errenteriara joan dira bi sari. Iñigo Leborguruk eta Aitor Albisturrek ex aequo edo erdibana jasoko dute 500 euroko saria Ama izango naiz eta Natasha lanengatik. Aipatu bezala, Amaia Iturriotz urretxuarrak aipamen berezia jaso du Gauzen logika bertsopaper lanarekin.
Euskarazko lan gutxiago
Narratiba lehiaketara euskaraz aurkeztu diren 15 lanen artean Alex Areizaga zumarragarraren Jendeak irrifarre egiteari utzi dio izan da onena. Gaztelaniazko lanean artean Madrilgo Alberto Fernandezena Fundido en negro izeneko lana saritu du epaimahaiak. Biek 500 euroko sari bana jasoko dute.
Amaitzeko, poesiaren atalean Alegiko Mikel Artolaren Muina lanarentzat izan saria euskarazkoen sailean eta Tuterako Dario Friasen Las afueras del tiempo gaztelaniazkoan. Kasu honetan ere 500 euroko sari bana jasoko dute biek ala biek. Epaimahaia Zumarraga-Urretxuko bertso eskolak, Felix Maraña, Carlos Aurtenetxe, Jesus Maria Corman, Elena Roman, Patxi Ezkiaga eta Irati Goikoetxeak osatu dute. Sari banaketa otsailean izango da.
