Hala onartu dute atzo iluntzean egindako ez ohiko osoko bilkuran Bilduren aldeko botoekin. PSE-EEk kontra bozkatu zuen eta EAJ eta H1! abstenitu egin ziren.
Urretxuko udalak 7.943.337 euroko udal aurrekontua izango du 2014an, “iaz baino %2 txikiagoa”, Oihane Zabaleta alkateak azaldu duenez. Udal aurrekontua atzo iluntzean egin zen ez ohiko oso bilkuran onartu zuen udalbatzak, Bilduren aldeko botoekin. PSE-EEk kontra bozkatu zuen eta EAJ eta Hamaikabat (H1!) abstenitu egin ziren.
Zabaletak Urretxuko udalaren ogasunaren egoera ekonomikoa “normala” dela esan zuen, neurri batean “diru sarrera arruntek gastu arruntak gainditzen” dituztelako. Udalaren egoera krisi orokorreko egoeraren testuinguruan kokatu du alkateak eta Urretxu 2020 sozietate publikoari egin beharreko ekarpenak ere aintzat hartu ditu, “urteko aurrekontua zuhurtziaz aztertzera eta gastua eustera behartzen” dituela aitortuz.
Udaletxearen finantza egoerari begiratuta, “eskura dauden baliabideen zerga bilketaren arintasunak eta maiztasunak gastuak puntualki ordaintzeko” aukera ematen duela esan du. Hala ere, altxortegian izan daitezkeen defizit batzuk konpontzeko iaz, “Caja Rural erakundearekin 450.000 euroko kreditu eragiketa” bat egin zela esan du. Zatika amortizatzen joan dira eta “2014ko martxoaren 23an kitatuta” egotea aurreikusten du udalak.
Aurrekontuak egiterako orduan hiru oinarri hartu dituzte batez ere kontuan. Batetik udaletxeko teknikarien iritziak, parte hartze prozesuaren egindako proposamenak, eta politikoen ekarpenak. Udal gobernuak aurkeztutako aurrekontuen helburua “dauden baliabideei ahalik eta etekin gehiena ateratzea da, gastu arrunta kontrolatuz, arrazionalizatuz eta zainduz”.
Sarrerak eta gastuak
Udal aurrekontuan, “oro har sarrerak jaitsi” egin direla aurreratu du alkateak, “zerga zuzenetan eta kapitalen diru laguntzetan izan ezik”. Lehenengoari dagokionez, “25.000 euro gehiago biltzea aurreikusten da, ordenantza fiskaletan eta prezio publikoetan tarifak, tipoak eta kuotak igo egin direlako”. Diru laguntzei dagokionez, “%541ean egingo dute gora, iazko 27.000 eurotik aurtengo 174. 295 eurora arte”. Murrizketak aldiz, “zeharkako zergetan, tasa, prezio publiko eta eta sarrera batzuetan eta diru laguntza arruntei dagokienean” aurreikusi dituzte.
Gastuei dagokionez, 2014rako aurreikusitako gastuak “aurreko ekitaldikoekin alderatuta 440.000 eurotan murriztu dira”. Dena den, benetako inbertsioen atalean ekitaldi honetarako inbertsio kopuru handiagoa biltzea lortu da, hein handi batean jasoko diren diru laguntzei esker. “Iaz baino 188.000 euro gehiago” izango dira eta “Kalerrotako asfalto lanak, Santa Barbara auzoko irisgarritasuna, kaleko argiterian energia aurrezteko jarduerak egiteko eta Irimo parte hartze prozesua egonkortzen joan ahala” egin diren lanei erantzuteko erabiliko dira.
