Mikel Serrano alkategai sozialista Datorren astean Zumarragako etxe guztietako postontzietara iritsiko da PSE-EEk datorren agintaldirako prestatu duen herri programa. Gaur, Zelai Arizti kultur etxean, Zumarraga aurrera begira lelopean prestatu duten programaren ildo nagusiak aurkeztu dituzte. Daukaten eskarmentutik abiatutako urratsak emango dituztela esan du Mikel Serrano alkategaiak eta datorren agintaldian egindakoari segida emango diotela.
Euskararen aldeko apustuari eutsiko diotela, Antioko Interpretazio Zentroa dinamizatuko dutela, ernegazioa sortuko ez duen hondakin bilketa ereduari jarraipena emango diotela, Zumarragako erdigunea oinezkoentzat bihurtuko dutela (Soraluze, Legazpi eta Euskadi plaza), auzoetan hobekuntza lanak egingo dituztela, Urtubin herri baratzeak jartzeko asmoa dutela… Horiek dira Serranok aipatu dituen erronketako batzuk.
Rosa Maizak hitza hartu du enplegua sustatze aldera egingo duten apustuaren berri emateko. Merkataritza aipatu du eta herri garapenerako proiektuak Zumarragan burutzeko aukera aurreikusi du, “nahiz eta diru asko lortu beharko dugunaren jakitun garen”. Proiektu horiek burutzeko espazioak Urolako geltokia eta geriatriko zaharra lirateke.
Arantxa Gonzalezek gizarte zerbitzuetako jardunaren oinarrian dauden lau zutabe nabarmendu ditu: beharra (udal erakundeak dira herritarrengandik hurbilen daudenak), errentagarritasuna (giza kohesioa sortzen duen heinean), aukera (enplegua sortzen du) eta zentzuz jokatzea (zerbitzuak koordinatzeko ahalegina).
Victoriana Badillok gaztedia eta hezkuntza izan ditu hizpide. Gazteen garapen profesionala indartu nahi dute eta kalitatezko hezkuntza eskaini maila guztietan. Badillok gardentasunaren ataria sortuko dutela esan du parte hartzeari buruz aritu denean. Maizak lekukoa hartu dio eta urrats txikiak baina seguruak emango dituztela adierazi du, hori guztia, herritar ororen parte hartzea sustatzeko.
Rosa Maiza, Victoriana Badillo, Arantxa Gonzalez eta Marivi Portugal
