Urtero egiten dute zine denboraldiaren aurkezpena Zumarragan. Alabaina, atzokoa bezain jendetsurik ez da izan aurretik. Mikel Serrano alkatea eta Hirutek enpresako arduradunez gain, opera maite duten hainbat herritarrek sortutako taldea bertan izan zen gaur abiatuko den denboraldirako prestatu duten zuzeneko emanaldien egutegia aurkezteko.
Denboraldiak, ohi bezala, zine komertziala eta zinekluba uztartuko ditu. Estreinaldiak iragarri zituen Rikar Intsausti Hirutek enpresa ustiatzaileko ordezkariak. Lehena asteburuan bertan izango da, Woody Allen zuzendari estatubatuarraren Irrational Man filma emango baitute. Donostiako Zinemaldiko sail ofizialean lehiatzen ari den Asier Altunaren Amama filma urrian emango dutela ere gehitu zuen. Gaur, baina, zineklubak abiaraziko du denboraldia What We Do in the Shadows (Itzaletan egiten duguna) filmarekin; Taika Cohen eta Jemaine Clementek iaz, Zelanda Berrian zuzendutako lana da.
Lehenengo aldiz Zelai Ariztin Londreseko Royal Opera House aretoan egiten ari diren opera emankizunak zuzenean ikusi ahalko dira. Aretoan instalatutako paraboliko berriei esker, bost opera emanaldi eta ballet ikuskizun bat ikusteko aukera emango dute apirila bitartean. Emanaldien berri Mikel Lizarralde zumarragarrak eman zuen atzoko aurkezpenean, «teknologiak ematen digun aukera hau baliatzeko modukoa da». Zuzenekoak izango direnez, ezin dituzte operak emateko egun nahiz ordutegi zehatzak ezarri, baina emanaldi guztiak aurrez iragarriko dituzte eta sarrerak eskuratzeko moduen berri ere emango dute.
Azaroaren 13an Mikel Urdangarinek bakarkako kontzertua eskainiko du Zelai Ariztin.
