Urretxuko Udalak eta sustatzaileak Gurutze Santuko babes ofizialeko etxeei buruzko bilera deitu dute gaurko. 19:00etan izango da, udaletxeko atarian. Bilera horretan urbanizazio horri buruzko xehetasun guztiak emango dituzte.
Gurutze Santun 140-150 etxebizitza egitea aurreikusten da. Horietatik ia 60 babes ofizialekoak izango dira. Duela gutxi babes ofizialeko lehen 22 etxebizitzak esleitzeko baldintzak ezartzen dituzten oinarriak onartu zituen udalak, aho batez. Etxebizitza horietako bat eskuratu nahi dutenek, zenbait baldintza bete behar dituzte.
Gaurko bileran etxeen prezioaren eta oinarrien berri emango da. Hauek dira baldintza horietako batzuk: Etxebiden izena eman behar dute 2017ko urtarrilaren 15a baino lehen, ez dute etxebizitzarik eduki behar jabetzan eta azken urte fiskaleko diru sarrera 9.000 eta 39.000 euro bitartekoa izan behar da. Bestalde, 2015eko abenduaren 1erako Urretxun erroldatuta hiru urte zeramatzatenek lehentasuna izango dute inguruko beste herri batzuetan erroldatuta daudenekiko.
Interesatuek 2017ko urtarrilaren 15etik maiatzaren 15era bitartean egin ahal izango dute eskaera. Eskaera egitearekin batera, oinarrietan eskatzen den dokumentazioa aurkeztu beharko dute.
