Koronabirusak euskaldun asko Euskal Herritik kanpo harrapatu ditu eta itzultzeko zailtasunak izaten ari dira. Horien artean izan dira Eusebio Zabala eta Maria Elena Gallego zumarragarrak. Poloniako Gdnask hirira joan ziren Ekaitz semea bisitatzera (bertan ikasten ari da) eta handik bi egunera Poloniako mugak itxi zituzten.
Espainiako enbaxadakoek hegazkin-konpainiakoei deitzeko esan zieten eta hauek ez zuten erantzuten. Hala, Poloniako LOT konpainiarekin hegaldi bat lortu zuten. Hegazkina Varsoviatik aterako zenez, Gdansketik Varsoviara joateko tren txartela ere erosi zuten.
Handik gutxira 14:00etako hegaldia bertan behera gelditu zela eta, nahi bazuten, 07:00etakoa har zezaketela esan zieten. 15 ordu bakarrik gelditzen ziren. Ziztu bizian, tren txartelak itzuli, 07:00etako hegaldirako txartelak erosi, hotelera joan, maletak egin eta Varsoviarako lehen trena hartu behar izan zuten. Gaua aireportuan pasa zuten. Hurrengo goizean, hegazkina hartu zuten. Madrilen utzi zituenez, auto bat alokatu behar izan zuten Loiuko aireportura joateko. Izan ere, beraien autoa bertan zuten.
