Goñiren omenezko txapelketako finala jokatuko du Ruiz de Larramendik ostiralean. Oskoz nafarra izango du aurkari, Beloki pilotalekuan.
Ostiralean, 21:30ean, Goñiren omenezko txapelketako finalak jokatuko dira Zumarragako Beloki pilotalekuan. Finalisten artean goierritar bat dago: Ander Ruiz de Larramendi lazkaotarrak promesa mailako lau t’erdiko finala jokatuko du Oskoz nafarraren aurka.
Ruiz de Larramendik 20 urte ditu. Bere familia oso pilotazalea da: aita eta osaba bat pilotariak izan ziren eta izeba batek eta lehengusu batek Emakume Master Cup txapelketan parte hartzen dute.
Txapelketa gutxi irabazi ditu, orain arte jokatutako final gehienak galdu egin baititu. Lau t’erdiko txapelketetan eman du bere maila onena. Sakea, gantxoa eta bolea dira kolpe kuttunak eta ostiraleko finala jokatzeko irrikatan dago. «Hau da berrogeialdiaren ondoren jokatu dudan txapelketa bakarra eta finalera heltzea lortu dut. Oso gustura nago. Finala gogorra izango da, Oskoz ere borrokalaria baita».
Lazkaotarren babesa izango du, noski. «30 bat senitarteko eta lagun joan behar dira Lazkaotik Zumarragarra. Gainera, UGLEn ikasi nuen eta Urretxu-Zumarragan egindako lagunak ere joango dira».
Koronabirusak pilota ere gogor kolpatu du eta ez du etorkizunean pentsatu nahi. «Gozatu eta listo. Gainera, mekatronika ikasi nuen eta duela gutxi lanean hasi naiz».
