Ehunka herritarrek eskatu dute berriz Zumarragako anbulatorioko Etengabeko Arreta Gunea (EAG) egunero eta eguneko 24 orduetan irekitzea
Manifestazioa egin dute Zumarraga eta Urretxuko kaleetan zehar, euripean, Osasun Zentroa 24/7 plataformak deituta. Datorren asteazkenean elkarretaratzea egingo dute, 18:00etan, anbulatorioaren aurrean.
Manifestazioa egin dute gaur eguerdian ehunka herritarrek Urretxu eta Zumarragako kaleetan, Zumarragako anbulatorioko Etengabeko Arreta Gunea (EAG) egunero eta eguneko 24 orduetan irekitzeko eskatuz. Osasun Zentroa 24/7 plataformak deitutako manifestazioa izan da, eta mobilizazio gehiagoz lagunduta dator, elkarretaratzeak ere antolatu dituztelako hileko lehen eta hirugarren asteazkenetan, 18:00etan, anbulatorioaren aurrean. Hurrengoa datorren asteazkenean izango da, hilaren 16an.
Manifestazioaren amaieran oharra irakurri dute Osasun Zentroa 24/7 plataformako ordezkariak. Bertan, pandemiak osasun zerbitzu publikoetan ekarri dituen murrizketak salatu dituzte, eta larrialdietako zerbitzua lanegunetan arratsaldeko 17:00etatik goizeko 08:00etara itxita, herritarrek “euren osasunerako funtsezkoa den zerbitzu bat” galtzen ari direla nabarmendu dute. “Azken urte hauetan, eta are gehiago pandemia hasi zenetik, duela gutxi ezagutzen genuen bezalako osasun publikoa desegiten ari da; itxaron-zerrenda luzeak daude guri arreta emateko, eta egiten dutenean telefonoz egiten da, eta orain larrialdi zerbitzua ia desagertu da”. Beste herri batzuetan ere geratzen ari dela esan dute, eta horrelako erabakien ondorioa “biztanleriaren osasuna hondatzea” dela. Horren guztiaren aurka eta larrialdi zerbitzua berreskuratzeko asmoz Osasun Zentroa 24/7 plataforma sortu berri dutela esan dute azkenik, eta herritar guztiei irekita egoteaz gain, herritarren laguntza ezinbestekoa dutela erantsi dute.
Zumarragako anbulatorioko Etengabeko Arreta Gunea egunero irekitzen zen martxora arte: astelehenetik ostiralera 17:00etatik 08:00etara eta larunbat, igande eta jai egunetan eguneko 24 orduetan; Urretxuko eta Zumarragako biztanleei ez ezik, Legazpikoei eta Ezkio eta Itsasokoei ere ematen zien zerbitzua. Martxoan Osakidetzak ixtea erabaki zuen, koronabirusari hobeto aurre egiteko. Udazkenean ireki zuten berriz, baina larunbat, igande eta jai egunetan bakarrik, 09:00etatik 21:00etara. Gainontzeko egunetan, Goierri garaiko bizilagunek anbulatoriora deitu behar dute eta bertan telefonoz artatzen dituzte, edo Beasaingo anbulatoriora edo Zumarragako ospitalera bideratzen dituzte.
