Josu Maroto marrazkilariak eta Ekaitz Goikoetxea idazleak 'Balio erantzia' erakusketa irekiko dute gaur Zumarragako kultur etxean. Goikoetxeak hitz bana oparitu die Marotoren marrazkiei.
Irudi batek mila hitzek baino gehiago balio duela esaten da, baina zertarako ibili bataren eta bestearen balioa konparatzen? Ez al da hobe batari bestearen balioa eranstea? Hori da Josu Maroto marrazkilari urretxuarrak eta Ekaitz Goikoetxea idazle beasaindarrak Balio erantzia erakusketan egin dutena: Goikoetxeak Marotoren irudiak aberastu ditu, bere hitzekin. Erakusketa gaur irekiko dute Zumarragako Zelai Arizti kultur etxean eta hilaren 31 arte egongo da zabalik.
Marotok eta Goikoetxeak bisita gidatuak antolatu dituzte. Martxoan 17an egingo dutenerako tokia dago oraindik. Kultur etxean eman behar da izena.
Urtarrilean Marotok gorputzaren bolumenaren eta edertasunaren inguruko 100 marrazki egin zituen eta, nola erakutsi pentsatzen ari zela, irudi bakoitzari hitz bat oparitzea erabaki zuen. «Bi arte diziplina elkartzea erabaki nuen. Gainera, Ekaitz aspalditik ezagutzen nuen eta aspalditik genuen elkarrekin zerbait egiteko gogoa. Egun batetik bestera, nire marrazki guztiak bota nizkion. Zer datorkizu burura?, galdetu nion».
Goikoetxeak oso gustura lan egin du Marotorekin. «Aforismo liburu bat prestatzen ari naiz eta bere deia jaso nuenean nire liburua berak ilustratzea nuen buruan. Egun baten gorabeheran, aurreratu egin zitzaidan. Bere proposamena oso ederra iruditu zitzaidan. Aforismo trinkoagoak egitea eskatu zidan: irudi bakoitzari hitz bakarra ematea. Erronka puntua ikusi nion. Irudi batek mila hitzek baino gehiago balio duela esaten da eta nik hitz bakarra erabili nezakeen irudi bakoitzeko. Hori dela eta, hitz bakoitza oso ondo aukeratu behar nuen. Irudiak adierazi egiten du eta hitzak esan».
Freskotasuna
Biek lan freskoa dela diote. «Irudiak aztertzen hasi nintzenean, segidak ikusi nituen. Bost hitz jarraian etortzen zitzaizkidan. Irudiak eta gaia asko gustatu zaizkit. Nik ere asko hausnartu dut azkenaldian irudiaren eta edertasuna ulertzeko moduaren inguruan. Eta norberarena beste batekin partekatzeak lana aberasten du».
Lana are gehiago aberasteko, ikusleekin topaketak antolatu dituzte. Ikusleei erakusketaren berri emango diete eta ikusleek ere irudiak hitzekin aberasteko aukera edukiko dute.