Maitane Hernandez (Urretxu, 1994) Valentziako Taronja Games txapelketako finalera sailkatu da. Atletismoa, gimnasia erritmikoa eta futbola egin izan ditu, crossfitean hasi aurretik.
Betidanik izan al zara kirolzalea?
Bai. Familiatik datorkit. Aita korrikalaria da eta bizikletan ibiltzen zen. Anaiak, berriz, atletismoa egiten du.
Zein kiroletan aritu zinen crossfitean hasi aurretik?
Atletismoan hasi nintzen eta Espainiako txapelketan parte hartu nuen. Atletismoa egiten nuela, gimnasia erritmikoan ere hasi nintzen. Nik zaletasun bezala hartzen nuen, baina Eibarretik eta Bergaratik deitu zidaten. Bergara gertuago dagoenez, Bergarara joan nintzen. Horretarako, atletismoa utzi nuen. Unibertsitate ikasketak hasi aurretik, gimnasia erritmikoa utzi nuen. Beti kirolzalea izan naizenez, futbolean hasi nintzen, Urolan. Sevillanak eta saloi dantzak ere egiten ditut, amarekin.
Atletismoan, zein probatan aritzen zinen?
300 metroko hesi-lasterketa egiten nuen. Gimnasia erritmikoa egiten nuenez, hesiak erraz gainditzen nituen. Luzera saltoa ere egiten nuen. Eta neguan, krosa.
Gimnasia erritmikoan txapelik lortu al zenuen?
Gipuzkoako eta Euskadiko txapelduna izan nintzen, bakarka.
Noiz arte jokatu zenuen futbolean?
20 urte bete arte.
Nolatan hasi zinen crossfitean?
Ikasketak Salamancan egin nituen eta masterra Valentzian. Hona itzuli nintzenean, Infinit Fitness gimnasiora joaten hasi nintzen. Salto enpresako entrenatzaileekin astean bi aldiz 30 minutuko entrenamenduak egiten nituen, intentsitate altukoak. Nire anaia eta lagun bat Crossfit Txindokira joaten hasi ziren eta nik ere bonu bat hartu nuen. Gustatu egin zitzaidan, baina itxiera perimetralak zirela eta, joateari utzi nion. Bergaran lan egiten dudanez, erizaina naiz eta Bergarako anbulatorioan lan egiten dut, Bergaran eman nuen izena. Duela zortzi hilabete hasi nintzen.
Nolatan erabaki zenuen Valentziako txapelketan parte hartzea?
Kirola oso gustuko dut, estresari aurre egiteko balio dit, eta egunero entrenatzen hasi nintzen. Valentziako txapelketan parte hartzea proposatu zidaten eta baiezkoa eman nuen. 70 ginen eta 12 pasa gara finalera. Uztailaren 16, 17 eta 18an jokatuko dugu finala. Urrian beste txapelketa bat jokatuko dugu Madrilen, taldeka.
Zergatik gustatzen zaizu horrenbeste crossfita?
Gorputz osoa lantzen duzu, ariketa asko egiten direnez (pisuak, korrika, igeriketa, gimnasia, arrauna, sokasaltoa…) beti duzu zertan hobetu, giro polita dugu…
Kirolari osoa izan behar da ondo aritzeko eta estrategia ere oso garrantzitsua da. Norberaren gorputza oso ondo ezagutu behar da, erritmoa ondo kalkulatu ahal izateko.
Oso kirol gogorra da, ala?
Bai, baina egin dudan kirolik gogorrena gimnasia erritmikoa da. Entrenamenduak luzeak eta zailak dira eta oso diziplinatua izan behar da. Ariketak behin eta berriro egin behar dira ondo egiteko. Crossfita zaletasun bezala egiten dut, baina asko entrenatzen dut geroz eta hobeto aritzeko. Kontuz ibili behar da, ordea. Norberaren gorputza oso ondo ezagutu behar da, behar baino pisu gehiago altxatzen ez saiatzeko.
Nola ikusten duzu Valentziako finala?
Ez nuen espero finalera iristea, baina finalera sailkatu ginenetik askoz ere gogorrago entrenatzen ari gara. Egunero hiru ordu entrenatzen ari gara. Igandean bakarrik hartzen dugu atseden. Hala, finalerdietatik hona, asko hobetu dugu. Gainera, finalera sailkatu den Bergarako taldeko beste neskak (Nora Ugarteburu) eta biok oso harreman ona dugu, pike sanoa dugu, eta horrek hobetzen laguntzen digu. Antzeko mailan dagoen batekin entrenatzea oso aberasgarria da. Nire helburua finalean nire onena ematea da. Nahiago dut hamabigarren gelditu nire onena emanda, nire onena eman gabe irabaztea baino. Edozer gerta daiteke. Bergarako taldean oso giro ona dugu eta finalerdietan taldekideen animoek indar handia eman ziguten.
Jendea crossfita egitera animatuko al zenuke?
Noski. Nik zerbikaletan arazoak nituen eta crossfita egiten dudanetik askoz ere hobeto nago. Gainera, oso kirol dibertigarria da. Adin eta gorpuzkera guztietako jendeak egin dezake, bakoitzak bere mailan. Crossfitean gorputz osoa lantzen da eta pixkanaka emaitzak ikusten dira.<