Bi-Tartean merkatari elkarteak Ber4 kanpainari amaiera eman dio Pagoeta gune soziokulturalean (Pagoetako eliza izan zen eraikinean). Herritar ugari elkartu dira bi herriotako merkatariek antolatutako ekitaldi ikusgarri eta hunkigarrian.
Hasteko, Oihane Vicentek, Uxue Kerejetak eta Andoni Salamerok dantza, musika eta poesia ikuskizuna egin dute. Tokian tokiko merkataritzaren eta artearen aldeko aldarria egin dute.
Ondoren, kanpainaren ikus-entzunezkoa eman dute eta aurten jubilatu diren Bi-Tarteaneko bazkideak omendu dituzte. Omenduak Fernando Salegi harategiko Fernando Salegi eta Mailu Odriozola, Ederrena etxetresna-dendako Jose Luis Madina eta Rosa Hernandez, Lorea drogeriko Ana Elgarresta eta Oiarbide oinetako-dendako Andres Oiarbide eta Lurdes Garikano izan dira.
Horretaz gain, bertaratuek herriko sortzaileek egindako mantalak ikusteko aukera izan dute eta amaieran mokadutxoa egingo dute, Bertatik Bertara egitasmoko produktuekin.
Kanpainaren ikus-entzunezkoa ikusteko, sakatu hemen.
Astelehenetik hilaren 25era Urretxuko eta Zumarragako sortzaileek egin dituzten mantalen erakusketa egingo da Zelai Arizti kultur etxeko sarreran. Mantal horiek (30) erakusketak iraun bitartean kanpainara atxikitako establezimenduetan erosketak egiten dituztenen artean zozkatuko dira. Erosketa horiek gutxienez 40 eurokoak izan behar dira.
Bi-Tartean Urretxuko eta Zumarragako merkataritza, ostalaritza eta zerbitzu enpresen elkarteak apirilean jarri zuen abian Ber4 kanpaina: berrerabili, berrasmatu, berpiztu eta berreskuratu.
Jasangarritasunarekin lotuta dagoen kanpaina da, eta ingurumenarekiko jasangarritasunaz gain jasangarritasun sozialari heltzen dio, gure inguruari balioa emanez.
Kanpaina lau fasetan garatu da. Erabiltzen ez ziren galtza bakeroak biltzen hasi zuten kanpaina (lehenengo fasea, berrerabili). Praka horiei beste erabilpen bat eman nahian, mantalak egin zituzten (bigarren fasea berrasmatu). Mantalak, 108 guztira, Mairi elkarteko kideek eta Ur Lantokiak egin dituzte.
Bi-Tarteanek mantal horietako gehienak Urretxu eta Zumarragako elkarteei oparitu dizkie, herriaren alde egiten duten lana aitortzeko eta eskertzeko. Gainontzekoak herritarren artean zozkatuko dira.
