Udal hauteskundeak direla eta, Juanjo Sagarna EAJko Zumarragako zinegotzi ohiak gutun bat igorri du komunikabideetara. Horra hor gutunaren edukia.
HAUTESKUNDEETAKO EMAITZEN AURREAN
Joan den igandeko hauteskundeen emaitzek azken urteotako Zumarraga gobernatzeko modua errotik alda dezakeen eta aldatu behar duen panorama marraztu dute. Bereziki, azken 14 urteetakoa.
Lehenik eta behin, argi utzi nahi dut inoiz ez dudala PSE-EErekiko ezinikusirik sentitu. Aitzitik, haiekin egindako akordioen defendatzaile sendoa izan naiz. Izan ere, bere historiagatik, konpromisoagatik eta herri ordezkaritzagatik, PSE-EEk herrialde honetako hitzarmen handietan parte hartzeko eskubide eta merezimendu osoa du. Esan, duela gutxi arte akordio horietan parte hartzen zutenak traidoretzat eta espainolistatzat jotzen zituztenek, gaur egun akordio horiek bilatzen eta defendatzen dituztela.
Eta PSE-EEri errespetu izugarria diot, baita ere, terrorismoaren eta fanatismoaren ondorioak pairatu zituelako. Horrek sozialista askoren hilketa ekarri zuen. Horietako batzuekin oso harreman pertsonal ona nuen.
Baina PSE-EEk arazo bat du Zumarragan. Arazo horrek izen-abizenak ditu: Mikel Serrano. Eta arazo hori PSE-EEk berak konpondu beharko luke.
Gaur egungo alkatea, alkatetza errebotez lortu zuen hori, etsaiak ereiten jardun da. Bere proposamenekin bat egiten ez zutenei eta berarekin ados ez zeudela ziotenei tratu umiliagarria eta errespetugabea eskaini die.
Demokrazia iritsi zenetik, bera izan da oposizio guztiak (hiru alderdik) udalbatza uztea lortu duen alkate bakarra. Alkateak oposizioko alderdi bateko bozeramailea iraindu eta mespretxu zuelako utzi zuten udalbatza. Bere iritziekin bat ez zetozen bozeramaileekiko eta zinegotziekiko gutxiespenak urtez urte errepikatu dira.
Azken batean, alkate batengan onartezinak diren izateko eta jarduteko modu lotsagarriak dira. Bere neurrigabeko egoaren gainetik, akordioak bilatzea, proiektuak partekatzea eta herritarren interesak defendatzea jarri beharko luke.
Ez dakit alkate izaten jarraituko duen. Badakit, ordea, hala bada, oso gogorra egingo zaiola. Izan ere, guztiz sinetsita nago ezinezkoa egingo zaiola bere portaera aldatzea. Are gehiago, ez du aldaketa horren beharrik ikusiko. Egia absolutuaren jabe izanik, aldaketa besteek egin behar dutela pentsatzen jarraituko du.
Nire alderdiko zinegotziak eta gainerakoak normaltasuna eta aniztasunarekiko errespetua berreskuratzeko gai izatea espero dut. Urte luzetan, aldeak alde eta eztabaidak eztabaida, errespetua nagusi izan zen. Baita egoera oso zailetan ere.
