Gainzuriko ikasle, guraso eta irakasleek kontzentrazioa egin dute Hezkuntza sailaren erabakiaren aurka
Gainzurin matrikulatu nahi zuten hiru haur beste ikastetxe batera bidali ditu
Hezkuntza sailak matrikulen prozedura aldatu du eta zenbait familia eta ikastetxe kexu ageri dira. Horien artean, Gainzuri eta haurrak bertan matrikulatu nahi zituzten hiru familia. Izan ere, Gainzurin matrikulatu nahi zuten hiru haur beste ikastetxe batera bidali ditu. Gainzurik ikastetxeko guraso guztiei idatzi bat bidali die eta kontzentrazioa egin dute, familia kaltetuei babesa adierazteko.
Gainzurik gertatutakoaren berri eman du. «Aurreko otsailean, 2023-2024 ikasturteko matrikula epea izan zen. Gainzurin, 54 plazako eskaintza genuen gehienez 2 urteko geletarako eta 46 ikasle matrikulatu ziren, 8 plaza libre geldituz. Hezkuntza Sailak, segregazioari aurre egiteko aitzakiarekin, aurtengo matrikuletarako prozedura aldatu egin du. Matrikula berria egin duten familiek galdetegi bat bete behar zuten eta horren arabera, ikasleak zaurgarri eta ez zaurgarri bezala sailkatu ditu. Zaurgarritasun indize hori ikastetxeen artean oreka bat izateko ikasle batzuk ikastetxez mugitu dituzte. Gauzak horrela, Gainzurin matrikulaturiko 3 ikasle ez zaurgarri, beste ikastetxe batera bidali dituzte eta gurera beste ikastetxe batetik ikasle ez zaurgarri bat bidali dute».
Horren ondorioz, Gainzurin 46 matrikula izatetik 44 izatera pasa dira. Hau da, bi matrikula gutxiago. Eta hiru familiaren nahia zapuztu da. «Gure ustez, mugimendu solte horiekin zaurgarritasun indizearen arazoa ez da konpontzen eta familiek beraien seme-alaben eskola erabakitzeko duten eskubidea erabat urratzen da. Uste dugu ere, familia batek ikastetxe publikoa aukeratzen badu, eta bertan, plaza nahiko badago, bere aukera errespetatu egin behar dela eta ez dugu onargarria ikusten, itunpeko ikastetxe batera mugitzea».
Gainzuritik beste ikastetxeetara mugitu dituzten hiru familia horiek errekurtsoa jarri dute Hezkuntza Sailaren aurrean eta erantzunaren zain daude momentu honetan. «Hiru familia horiei bizitzen ari diren egoera zail honetan gure babesa eskaini nahi diegu eta Hezkuntza sailari bere erabakia atzera bota dezan eskatu».
