Poloniako eta Hego Koreako talde banak parte hartuko du, besteak beste
Urretxuko Santa Anastasia jaiak irailaren 20tik 23ra ospatuko dira, baina urteroko moduan aurreko asteburuan ere hainbat ekitaldi izango dira. Larunbatean Lurra dantza taldearen herri arteko 35. folklore jaialdia izango da. Ekitaldiak Gernikako Arbola plazan eta Areizaga-Kalebarren plazan izango dira, 10:00etatik aurrera. 14:00ak arte folklore azoka egingo dute Areizaga-Kalebarren plazan. 13:00etan munduko dantzen ikastaroa egingo dute Gernikako Arbola plazan. 18:00etan, toki berean, dantza saioa izango da. Aurtengo jaialdian bost taldek parte hartuko dute: Mikel Deuna (Iurreta, Bizkaia), Agrupacion Folclorica Alcazaba (Espainia), Giewont Dance Group (Polonia) eta Nalmoe Bukchum (Hego Korea). Herri arteko folklore jaialdiaren inguruan argazki lehiaketa antolatu da. Eguraldi txarra egiten badu, ekitaldiak kiroldegian izango dira.
Bestalde, 10:00etan bolillo erakustaldia eta topaketa egingo dute Gernikako Arbola plazako karpan. 100 lagun inguruk parte hartuko dute. Gainera, 17:00etan Gipuzkoako Bertsolari Txapelketako lehen saioa jokatuko da Labeaga aretoan. Final zortzirenetako zazpi saioetan aurrenekoa izango da. Urretxuko saioan urretxuar batek abestuko du, gainera: Mikel Iturriotzek. Txapelketan beste hiru urretxuarrek parte hartuko dute: Maialen Akizuk, Uxue Fernandezek eta Amaia Iturriotzek. Amaia Iturriotzek irailaren 15ean abestuko du, Lasarte-Orian; Uxue Fernandezek irailaren 22an, Elgoibarren; eta Maialen Akizuk urriaren 5ean, Azpeitian. Hiru hilabete iraungo ditu txapelketak, eta 16 saio jokatuko dira –zazpi final-zortziren, bost final-laurden, hiru finalaurreko eta finala–. Donostiako Illunben jokatuko da finala abenduaren 14an. Saio guztietarako sarrerak www.bertsosarrerak.eus webgunean daude eskuragarri.
Datorren asteburuan beste bi ekitaldi ere izango dira. Igandean, hain zuzen ere. 11:00etan bola eta toka txapelketa jokatuko da Gernikako Arbola plazan. Eta egun osoan zehar Adinekoen Eguna ospatuko da.
