
Atzo arratsaldean 2025eko ordenantza fiskalak onartu zituzten Urretxuko osoko bilkuran. Zerga, tasa eta prezio publiko gehienak %3 igoko dira. EAJk eta PSE-EEk alde bozkatu zuten eta EH Bilduk aurka.
Uztaileko urteko Kontsumo Prezioen Indizea (KPI) %2,9 izan zen eta horretan oinarritu dira zerga, tasa eta prezio publikoen igoera zehazteko orduan. Salbuespenen artean industria arloko zaborren tasa dago. %35 igoko da. Izan ere, Urretxuri urtean 120.000 euro kostatzen zaio industriak sortzen duen zaborra jasotzea eta iaz %75eko igotzea erabaki zuten kostuari aurre egin ahal izateko. 2024an %40 igo da eta 2025ean aipatutako %35a igoko da.
Bestalde, kirol instalazioetan bonu berri bat eskainiko da. 50 euroren truke 10 egunetan kiroldegia erabili ahal izango da eta 80 euroren truke pilotalekua 10 aldiz.
PSE-EEko Alex Gonzalezek ordenantzak gustukoak dituztela esan zuen eta kirol instalazioetako 10 egunetako bonua beraiek proposatu zutela gogoratu zuen.
EH Bilduko Jon Altolagirrek proposamen “eraikitzaileak eta anbiziotsuak”, baina aldi berean “egingarriak” aurkeztu dituztela esan zuen. Progresibitatea defendatzen dute eta EAJk eta PSE-EEk ez dutenez horren aldeko apostua egin, aurka bozkatu zuten.
Jon Luqui alkateak beraiek beste eredu bat defendatzen dutela esan zuen. “Bizilagun zaurgarriak oso ondo identifikatuta daude eta laguntza pertsonalizatua eskaintzen zaie. Ondo artatuta daude. Zaurgarriei laguntzeko sistema propioa dugu eta fiskalitatea horren atal bat da. Progresibitatea kudeatzea ez da erraza”.
Altolagirrek beraiek proposatzen dutena dagoeneko beste herri batzuetan martxan jarri dutela (Lazkao eta Errenteria aipatu zituen) eta pixkanaka toki gehiagotan martxan jarriko dela uste dela esan zuen. Luquik herri bakoitzak bere ezaugarriak dituela eta Urretxuk gizarte zerbitzuetan biztanleko gehien gastatzen duen herria dela erantzun zuen.