Gaur jokatuko da, 17:00etan, Euskadi plazan
Gaur, 17:00etan, kuadrillen arteko olinpiadako finala jokatuko da Zumarragako plazan. No Limits-Abenida taberna, RMF-Aitube Berri, BPG-Zuzen Zerbitzu Grafikoak eta EMTF-Faka Gipuzkoako Energia taldeek parte hartuko dute. Zazpi proba izango dituzte: sei herri kirol modalitate eta Belokira igoera. Parte hartzaileek gaur bertan jakingo dute zehatz-mehatz zein lan osatu behar duten. Egunotan herri kiroletan trebatu dira, Urretxu-Zumarragako Herri Kirol Elkartearen bidez.
Puntu gehien lortzen duen taldeak lortuko du kuadrillen arteko kirol txapelketako lehen edizio honetako garaipena. Proba bakoitzean irabazleak hiru puntu jasoko ditu, bigarrenak bi, hirugarrenak bat eta azkenak zero. Zazpi probetako puntuak batuta berdinketarik balego, denborak hartuko lirateke kontuan.
Sariei dagokienez, irabazleek 1.000 euro jasoko dituzte Zumarragako dendetan gastatzeko, 250 euro Urzubi tabernan bazkaria edo afaria egiteko eta 800 eurotan baloratutako lau saio Enrique Gorostegi personal trainerrarekin. Bigarren sailkatuek 350 eurotan baloratutako bazkari edo afaria izango dute Balentiña jatetxean eta podiuma osatzen duen taldeak 200 eurotan baloratutako ATA harategiaren saskia.
Horra hor finalaren aurkezpenean eta herri kirol entrenamenduetan ateratako argazki batzuk.
