Zumarragako jaietako egun handia da gaur, Santa Isabel, eta erromeria giro bete-betean ari dira ospatzen eliza inguruan. Irrintzikoek ohiko ezpata-dantza egin dute, eta kuadrillez eta familiez bete dira inguruko mahaiak, bazkarirako. Jaitsierarekin amaituko da goiko festa.
Santa Isabel da gaur, zumarragarrak Antioko baselizaren inguruan biltzeko eguna, eta aurten ere konplitu dute ohiturarekin, aurreko eguna baino eguraldi freskoago eta hezeagoarekin.
Goizean hasi da tradizioz beteriko egun hau, herritik Antioraino herritarrek, dantzariek eta txistulariek egindako erromeriarekin, eta jarraipena izan du elizan eta eliza ondoan. Arratsaldera arte luzatuko da festa goian, jaitsiera hasi arte. Gero Eitzan jarraituko dute dantzak eta musikak, eta erdigunean ondoren, egun honi amaiera gauean emateko.
Ezpata-dantza eta txistulariak
Duela hamar urte lehen emakumeak atera zirenean bezalako zalapartarik gabe, baina aurten ere oso solemnea izan da Irrintziko dantzariek amabirjinari ezpata dantza egin dioten unea. Kapitainak Miren Hernandez, Irati Etxeberria, Ane Esnal eta Iñaki Urteaga izan dira, eta sokan Adur Garmendia, Jon Calzada, Elena Urteaga, Malen Larrañaga, Izaro Baztarrika, Saioa Telleria, Itsaso Zurutuza, Intza Larrañaga, Oihane Etxeberria eta Nahia Alustiza joan dira.
Ohi bezala, Antxinako Ama txistulari bandako kideek jarri diote musika ezpata-dantzari eta dantzarien jardun osoari. Aurten, Oier Zabaleta (atabala), Maria Jesus Arratibel (1. txistua), Aitor Zabaleta (1. txistua), Ainhoa Zumarraga (1. txistua), Maialen Zubizarreta (2. txistua), Iñaki Aldalur (2. txistua), Mikel Urteaga (2. txistua), Gorka Janeiro (silbotea) eta Lierni Goia (silbotea) izan dira taldean.
Arratsaldera arteko festa
Ezpata dantzaren ondoren, prozesioan atera dute amabirjina eliza inguruan eta meza ospatu dute gero barruan. Amaieran, ermita atariko dantza saioa egin dute, eta eguerdia aurrera joan ahala, kuadrilla eta familiarteko bazkariak egin dituzte, inguruetan prestatutako mahaietan. Bertsolariek eta trikitilariek alaitu dute bazkalaurreko giroa. Trikitilarien artean Urteaga familiako hiru belaunaldi izan dira jotzen, Miguel, Kepa semea eta Kenare biloba.
Ohi bezala, aurten ere jendetza igo da Antiora, eta goizean goizetik autobusak beteta igo dira herrigunetik.
Festa giroak ez du etenik izango arratsalde osoan, eta erromeriari amaiera emateko, Antioko ‘jaitsiera’ egingo dute, ohi bezala Eitzan dantzarako eta cava edateko geldialdia eginez. Herrigunean, Alaitasuna errondailaren emanaldia izango dute zain.
