Zumarragako EH Bilduk legegintzaldiko lehen bi urteetako balorazioa egin du. Horra hor komunikabideetara igorri duten prentsa oharra:
“Lehen bi urte hauetan bizilagunengandik gertu, herritarren beharrak entzuten eta behar horiei erantzuteko proposamenak udalera eramaten saiatu gara gogoz, eta lana eraginkortasunez, zorroztasunez eta seriotasunez egiten saiatu gara. Oso kritikoak gara PSE eta EAJk osatzen duten udal gobernuarekin, baina kritika bakoitzari proposamen eraikitzaile, egingarri eta zehatz bat gehitu diogu beti; etengabe lankidetzarako eskua luzatuz eta adostasunak ere bilatuz.
Proposamenen edukia bezain garrantzitsua da gauzak ere nola egiten diren; eta Auzo Bihotz izeneko bi prozesu komunitario egin ditugu herritarrekin batera. Lehendabiziko ekimena erdialdeko auzotarrekin egin genuen aparkaleku eta mugikortasun arazoari erantzuteko asmoz eta horrela, proposamen sendo bat aurkeztu genuen udalean. Eitza auzoan ere antzeko prozesua eraman dugu aurrera eta orain gutxi aurkeztu diegu bizilagunei landutakoaren emaitza; eta laster bideratuko ditugu proposamenak udalera. Hurrengo Auzo Bihotz ekimena goiko auzoetan izango da eta hasi gara dagoeneko bere diseinuan.
Akordiorako prestutasuna eta gaitasunaren erakusgarri izan da 2025eko ordenantza fiskal eta aurrekontuetan lortutako akordioa; progresibitatean, etxebizitza eskubidean, mugikortasunean, merkataritzaren sustapenean, azpiegitura komunitarioen hobekuntzan eta euskararen alorrean aurrerapen garrantzitsuak lortuz. Norabide berri baterako akordioa egin genuen eta eskuzabalak izan ginen. Akordioari jarraipen zorrotza egiteko konpromisoa hartu genuen eta horretan ari gara orain.
Une honetan zumarragarentzat estrategikoa den prozesuan murgilduta gaude, Hiri Antolamenduko Plan Orokorra diseinatzen ari gara eta geure proposamenen berri ere eman genuen orain gutxi Zumarraga eraldatzeko proiektu estrategiko ugari aurkeztuz: Eitza, Mertzedariak eta herrigunearen arteko birika berria; Artiz-Arcelor eremuan igogailua eta kirol eta kultur ekipamendu aurreratuak egitea; Euskal Herria Hiribidea-Arcelor behingoz herritarrentzat berreskuratu eta ospitalerako sarrera aldatzea; edota Adif-eko hondartzan aparkaleku disuasorio handi bat egitea dira planteatu ditugun proiektu batzuk.
Alkatearen eta babesten duen udal gobernuaren kudeaketa ereduarekin oso kritikoak gara eta horren erakusgarri izan dira azken bi urteotatako oso gertakari larriak: Gerozerlan enpresari sententzia baten bidez ordaindu beharreko 500.000 euroak, Plastic Energy instalatzeko mugimendu ezkutuak, Arcelorren lizentziarik gabe jardun duten enpresen afera, zabortegiaren irregulartasunak, uraren judizializazio amaigabea edo enpresa desberdinak ezartzearen aldebakarreko erabakiak ditugu adibide. Eta legegintzaldiaren erdian gauden arren, oraindik ez dugu ezagutzen EAJ eta PSEren akordioaren edukia eta publiko egin behar zuten legegintzaldi plana ere ez da aurkeztu.
Zumarragak hazi egin behar du berriz. Hazi industrialki, hazi ekipamendu sozial berrietan; hazi bizitasun komunitarioan; Goierrin eta Gipuzkoan lehen zuen posizio indartsu eta estrategikoa berreskuratuz; Zumarragak indarberritze aro berri bat behar du eta herri erronka honek benetako kooperaziotik eta alderdien arteko oinarrizko adostasunetik etorri behar du ezinbestean eta geure prestutasuna azaltzen dugu berriz.
Baina kooperaziorako prestutasunaz gain lideratzeko eta gobernatzeko prest gaudela esan nahi diegu herritarrei. Azken urteotako lanak eta esperientziak aukera eman digu udala eta herria oso ongi ezagutzeko, badakigu nora joan nahi dugun, badakigu nola egin nahi dugun eta baditugu hori lideratuko duten pertsonak. Zumarragak aro berri bat behar du eta gu prest, anbizioz eta gogoz gaude aro berri hau lideratzeko eta gobernatzeko”.
