Sutobal enpresak Forjas de Zumarraga enpresako eraikina eraisteari ekin dio. Lehenago horretan espezializatutako enpresa batek amiantozko piezak kendu ditu. Fabrika bota ondoren, 30 etxebizitza libre egingo dituzte bertan. Etxebizitza horien eraikuntza lana 2026ko azken hiruhilekoan hasiko da.
Forjas de Zumarraga enpresa Pedro, Martina eta Juan Jose Arrizabalaga anai-arrebek jarri zuten martxan. Anai-arreba hauek Agiña auzoan jaio ziren: taberna eraiki zen tokian zegoen baserrian. Banan-banan, Agiñatik Zumarragara jaitsi ziren lan egitera.
Handik urte batzuetara, hiru anai-arrebak elkartu egin ziren eta aroztegi bat ireki zuten Kalebarrenen bertan. Ondoren, duela 65 bat urte, Forjas de Zumarraga enpresa sortu zuten.
Aroztegian mahaiak, aulkiak, jostorratzak eta esekilekuak egiten zituzten, besteak beste. Forjan, berriz, enpresa ezberdinentzako piezak egiten zituzten. Automoziorako pieza asko egin zituzten. Barreiros eta Santana enpresentzat, besteak beste. Enpresan 35 bat langile izatera iritsi zen, baina 2006an itxi egin zuten.
Bi bloke martxan
Sutobal enpresak hainbat etxebizitza egingo ditu Forjas de Zumarraga zegoen tokian eta bere inguruan. Bi etxebizitza bloke martxan ditu dagoeneko Kalebarrenen, Forjas de Zumarragaren ondoan. Eraikin bat altxatu du jada eta datorren urteko udarako prest egongo da. Bestean zuloa egin dute dagoeneko eta obra 2026ko amaieran bukatuko da.
