Hilaren 24tik 27ra Hatortxu Rock jaialdiaren azken edizioa egingo da Lakuntzan (Nafarroa). 26an Euskal Herriko elektrotxarangen topaketa egingo dute eta bertan Urretxu eta Zumarragako Joseto ta Alayak elektrotxarangak joko du. 13:30ean joko dute.
Joseto ta Alayak elektrotxaranga 2019an sortu zen. Joseto Anayak erromeria taldeko kide batzuk Hendaian presoen alde futbol-7 txapelketa antolatzen dutenekin elkartu ziren sagardotegi batean eta azken hauek elektrotxaranga bat behar zutela esan zieten. Beraiek jotzea erabaki zuten. Hurrengo kontzertua geltokietako jaietan izan zen, hilabete beranduago.
Egun 10-11 kide dira. Elektrotxarangek arrakasta handia dute. “Poteoak indar handia hartu du eta poteoetan jotzen dugulako dugu arrakasta. Izan ere, poteoetan jende askorengana heltzen gara. Abesti klasikoak eta egungoak jotzen ditugu”, azaldu du Aitor Carrascok.
Euskal Herriko herrialde gehienetan jo dute dagoeneko, baina Hatortxu Rock-en jotzeak ilusio berezia egiten die. “Azken edizioan parte hartzea oso polita izango da”, aipatu du.
