Herriko elkarteak Urretxuko jaien arima dira. Beraiek arduratzen dira, udalaren laguntzarekin, jaietako ekitaldi nagusiak antolatzeaz. Hala, urtero jaien aurkezpen ekitaldian parte hartzen dute. Asteartean hainbat elkartetako kideek, Jon Luqui alkateak lagundurik, jaietako ekitaldien berri eman zuten.
Hemen dira Urretxuko jaiak. Ekitaldi nagusiak hilaren 19tik aurrera ospatuko badira ere, asteburu honetan ere hainbat ekitaldi izango dira: Lurra dantza taldearen folklore jaialdia, adinekoen eguna eta toka txapelketa.
Juanlu Elgarrestak folklore jaialdiaren berri eman zuen. 10:00etatik 14:00etara folklore azoka egingo dute Areizaga plazan. Euskal Jairako materiala lortzeko aukera ezin hobea izango dela aipatu zuen. 12:00etan, udaletxean, folklore jaialdian parte hartuko duten taldeei harrera egingo diete. Aurtengo jaialdian Gasteizko Eguzki Lore dantza taldeak, Frantziako Mont de Marsan herriko Lous Tchancayres taldeak, Mallorcako (Herrialde Katalanak) Inca herriko Revetlers des Puig D’Inca taldeak, Guatemalako Agrupacion Folclorica Raxela taldeak eta Lurra dantza taldeak parte hartuko dute.
13:00etan, Areizaga plazan, talde horietako kideek beraien herrialdeetako dantzak irakatsiko dizkiete nahi duten guztiei. 18:30ean folklore jaialdia egingo dute Gernikako Arbola plazan. Lurra taldeko dantzari txikiek emango diote hasiera jaialdiari. Bitartean, gainontzeko taldeak kalejiran sartuko dira plazara. Horretaz gain, argazki lehiaketa egingo dute. Oinarriak urretxu.eus webgunean daude.
Lurra taldeak jaietako beste ekitaldi batzuetan ere parte hartuko du: igandeko adineko pertsonen festan, txistularien alardean eta Euskal Jaiko desfilean. Adineko pertsonen egunari dagokionez, 12:00etan korporazioak eguneko zentroa bisitatuko du. Bertan, bertaratutako zaharrenak omenduko dituzte. Ondoren, Lizarriturri txistulari taldeak lagundurik, elizara joango dira. Mezaren ondoren, argazkia aterako dute eta Incako eta Urretxuko dantzariek adinekoentzat dantzatuko dute. 14:15ean bazkaria egingo dute eta ondoren dantza lehiaketa.
Igandean toka eta bote txapelketa ere jokatuko da. Ino Ugarteburuk eta Jose Antonio Calvok eman zuten horren berri. Txapelketa horiek Gernikako Arbola plazan izango dira, 11:00etan. Ugarteburuk eta Calvok herritarrak parte hartzera animatu zituzten.
Gazte olinpiadak
Beñat Zamalloak Gazte Bideanek antolatutako gazte olinpiaden berri eman zuen. Hilaren 22an jokatuko da, goizez. 13 eta 18 urte bitarteko gazteek parte har dezakete eta izen-ematea zabalik dago. «Ez da gaitasun berezirik behar», esan zuen. Gazte Bideanek Odei Barrosoren kontzertua eta hip-hop jaialdia ere antolatu ditu. Hilaren 19an izango dira, 21:00etan eta 23:00etan, Gernikako Arbola plazan.
Pregoia Goierri Aldapa saskibaloi taldeko neskek irakurriko dute. Goierriren saskibaloi saileko Sergio Gonzalez de Galdeanok eskerrak eman zituen eta jaiei hasiera polita ematen saiatuko direla esan zuen.
Txistulariek ostiralean eta igandean kalejirak egingo dituzte eta larunbatean alardea. Ibon Garmendiak alardearen berri eman zuen. Andoni Oruesagastik bi dantza eskainiko dizkie bere aitaitei eta Benito Lertxundi omenduko dute. Benitoren bi ilobek bere bi kanta abestuko dituzte. Musikarekin jarraituz, Unai Izagirrek Iparragirre Balerdi musika bandak ostiralean kalejira egingo duela eta astelehenean dantzaldia aipatu zuen.
Herri kirolak
Izaskun Arrutik herri kirol elkartearen izenean hitz egin zuen. Larunbatean idi proba egingo dute eta astelehenean sokatira txapelketa. Gainera, igandean bi idi atonduko dituzte eta karroza egiten ari dira, elkartearen 35. urteurrena dela eta.
Goierri elkarteko Juan Luis Ayusok gastronomia lehiaketaz hitz egin zuen. Aurten ere sekulako arrakasta izan du: zazpi kuadrilla kanpoan gelditu dira. Jokin Rodriguezek sokamuturraren berreskurapenaz hitz egin zuen. «Euskal Herrian oso errotuta dago eta herriko jendearen eskaerari erantzun diogu. Araudia oso zorrotza da. Legedia beteko dugu. Lasaitasun mezua zabaldu nahi dugu».
Karrozeroak
Oier Fernandez karrozeroen izenean mintzatu zen. Hamahiru karroza aterako direla eta asteburu honetan txistorra-jana egingo dutela aipatu zuen. Bukatzeko, Goiargi abesbatzako Ana Alvarezek txistulari alardean abestuko dutela eta igandean kantu poteoa egingo dutela gogoratu zuen.
Hitza hartzen azkena alkatea izan zen. Jaietako zapiak dagoeneko salgai daudela eta kuadrillen bazkarian izena emateko epea astelehenean irekiko dela aipatu zuen (astelehenetik asteazkenera, 19:00etatik 20:30era, kultur etxean). Jendea Urretxura etortzera gonbidatu zuen eta ostiral eta larunbat gauean autobus zerbitzu bereziak egongo direla gogoratu zuen.
