Zumarragako EH Bilduk "irregulartasun larriak" atzeman ditu Gure Txoko tabernaren esleipenean eta lehenbailehen kontratua erregularizatzea eskatu du
Zumarragako EH Bilduren udal taldeak “udaleko dokumentazioa zorrotz aztertu ondoren”, Gure Txoko jubilatuen etxeko taberna-jatetxearen ustiaketaren inguruan “hainbat irregularitate eta gorabehera” daudela ikusi du. Horra hor komunikabideetara helarazi duten idatzia.
“Hasierako kontratua, 2000.urtean esleitua, 2006. urtean luzatu zen El Salvador gizarte etxearen kudeaketa gehituz. 2017. urtean lehiaketa publiko bitartez bi zerbitzuak aldi baterako enpresa elkarte bati esleitu zitzaizkion, hau Gure Txoko kudeatzen hasiz eta 2020eko urtarriletik aurrera El Salvador kudeatzea aurreikusiz. Alabaina, 2019 urte hasieran eta erabiltzaileen kexek eta udal txostenek baieztatzen duten bezala, zerbitzuaren inguruko hutsuneak atzeman ondoren Tokiko Gobernu Batzordeak kontratua etetea erabakitzen du kontratuan jasotakoa ez betetzeagatik. Ebazpen honen ondoren, larrialdi edo premiazko kontratu gisara eta espediente publikorik gabe eta legeak eskatzen dituen izapideak bete gabeko prozesu bat eta gero, ustiapena Barrenetxe JO 1964 sozietateari esleitu zitzaion. Egoera irregular hau sei urte baino gehiagoz luzatu da, kontratua behar bezala formalizatu gabe, eta gaur egun ere horrela jarraitzen du. Bestalde, aurretik El Salvador gizarte etxea ustiatzen zuen pertsonak, honen kontratu lagapena egin zion aipatu sozietateari. Gogoratu gizarte etxeko kudeaketak esleipendun berria bazuela eta aurrekoak 2020ko urtarrila arte bakarrik ustiatu behar zuela. Beraz, lagapen honek ere zalantzak sortzen dizkigu. EH Bildutik egindako kontsulta juridiko independiente batek ohartarazi du zuzeneko esleipen hauek, publizitate eta izapide administratiborik gabe egindakoak, Sektore Publikoko Kontratuen Legearen arabera baliogabetzat jo daitezkeela. Gainera, larrialdi edo premiazko egoeren bidea bidegabeki erabiltzea eta funtsezko izapide gabeziek ekintzaren baliogabetasuna larriagotzen dute. Kontratazio publikoan adituak direnek baieztatu digutenez, jarduteko era honek administrazio, ondare eta zigor erantzukizunak ekar litzake, Zigor Kodearen 404.artikuluan araututako administrazio prebarikazioaren figurarekin bat etor litekeen neurrian, artikulu horrek zigortu egiten baititu bidegabekeria dela jakinda emandako ebazpen arbitrarioak. Hau horrela, EH Bilduk beharrezkoak diren ekimen politiko guztiak gauzatuko ditu eratorritako erantzukizunak argitzeko, eta ezinbestekotzat jotzen du udalak egoera hau ahalik eta azkarren erregularizatzea, publikotasun, lehia eta legezkotasun printzipioetara egokitutako kontratazio prozedura berri baten bidez. EH Bilduk gardentasuna, inpartzialtasuna eta kalitate irizpideak eskatzen dizkio udalari herritarrentzako funtsezko zerbitzu publikoen kudeaketan, batez ere adinekoentzat hain garrantzitsuak diren Gure Txoko eta El Salvador bezalako zerbitzu publikoetan”.
