Iñaki Larrañaga urretxuarraren Oilar Beltzak taldea arrakasta itzela izaten ari da. Hegoaldeko herrialde guztietan jo dute dagoeneko. Irailean Zumarragan, Zegaman eta Gaintzan jo zuten eta azaroaren 7an Araman joko dute.
Argazkia: Josu Perez. Rantxerak modan daude eta Goierrik ere badu bere rantxera taldea: Oilar Beltzak. Iñaki Larrañaga (ahotsa), Imanol Intxausti (soinua), Xabi Arakama (baxua), Aratz Izeta (gitarra), Juanma Urriza (bateria), Joxe Martin Razkin (tronpeta), Iker Sukia (baxua) eta Ander San Josek (produkzioa) osatzen dute.
Taldearen bultzatzailea Larrañaga urretxuarra da. Urte askotan panderoa jo ondoren, rantxerak talde bat sortzeko gogoa zuen. «Pertsonak boladak izaten ditu eta bi umeak dezente hazi eta gero kanpora begira jarri nintzen. Rantxera bat erakutsi nien lagunei eta oso ona zela esan zidaten. Grabatzea erabaki genuen eta Beasaingo Pottoko estudiora jo genuen. Ondoren, bidean ezagututako jende askorekin taldea osatu nuen. Hasiera Imanol eta Xabierekin kontatzen nuen eta bati eta besteari deika zazpi laguneko taldea osatu dugu. Bi nafar ditugu (Urriza eta Razkin). Gainontzekoak goierritarrak gara. Azken urtebetean 30 bat kontzertu egin ditugu. Horren ibilbide motzean horrenbeste kontzertu egitea harrigarria da», aipatu du.
Lehen kontzertuak etxe ondoan egin zituzten. «Seguran, Zegaman… jo genuen. Santa Lutzi egunean, berriz, Urretxuko gaztetxean jo genuen. Gaztetxea bete genuen eta jendeari asko gustatu zitzaion. Aurten, Bizkaia, Nafarroa eta Arabara iritsi gara. Uztailean geltokietako jaietan jo behar genuen, baina kontzertua bertan behera gelditu zen, ekaitza zela eta. Irailean, berriz, Agiñan jo genuen».
Rantxerak jotzen dituzte, batik bat. «Rantxera tradizionalei ukitu berezia ematen saiatzen gara. Bestalde, euskal kanta zaharrekin ere nahasketa bereziak egiten ditugu. Taldea euskaratik egiteko asmoa dugu, baina erdaraz ere zerbait abesten dugu. Ikusiko dugu nora goazen, baina gehiena euskaraz izango da. Erromeria zaharretako kantak berreskuratu, kutsu horretako berriak egin… Hori da ideia. Nahasketa. Ez gara mariatxi talde bat eta ezta erromeria talde bat ere. Rantxerak eta kunbiak nahasten dituen euskal giroko talde bat gara».
30 bat kanta jo dituzte orain arte. Horietatik hamar bat, beraien hitzekin. «Abestiren bateko hitzak Aitor Sarriegiri eskatu dizkiot, baina beste asko nik egin ditut. Musikari dagokionez, abesti gehienak hartutakoak dira, baina gure ukitua eman diegu. Gure erreferenteak direnen kantak hartzen ditugu: Benitoren abesti bat dugu, Elgetarena, Lajari entzun genion bat, Eganek jotzen zuen bat… Ea gureak ere egiten ditugun, baina horrek lana eta denbora eskatzen du. Jendea zain dagoela uste dut. Iparragirreren Hara nun diran abestiaren bertsio bat prestatzen ari gara. Izan ere, inmigrazioaren gaiari begiratzen diogu eta mugetako musika jotzen dugu. Mexikoko mugakoa, baina baita gure mugakoa ere. Egunerokotasuna duten gainontzeko gaiak ere lantzen ditugu».
Azken kontzertuak Zegamako Kinto Egunean, Gaintzan, Iurretan (Bizkaia) eta Ibirikun (Nafarroa) egin dituzte. «Zegamakoa kontzertu berezia izan zen guretzat, zegamarrek asko lagundu baitigute hasieratik». Azaroaren 7an Goierrin joko dute berriro: Araman. Eta Santa Lutzi egunean berriro gaztetxean jotzeak ilusio handia egingo lieke.
Oilar Beltzak taldeko abeslaria Esteban Larrañaga zenaren semea da. Larrañaga trikitixa zale amorratua zen (Trikitixa Elkarteko lehendakaria izan zen). «Gure etxea soinuaren santutegi txiki bat zen. Etxean, autoan, asteburuetako planetan… trikitixa zen nagusi. Aita antolaketa lanetan, epaile lanetan, aurkezle bezala… ibiltzen zen eta gu bere atzetik».
Semeak panderojoleak imitatzen zituen eta Azkoitira eraman zuten ikastera, Luis Alberdi Zabalerengana. «Aita Loiolakoa zen, baina aitaita eta amama azkoitiarrak nituen, Martittekoak. Ama, berriz, zegamar jatorriko urretxuarra da. Aitona eta amona Zegamakoak ziren. Nahasketa ona dut».
Urretxuko Euskal Jaiko desfilean jo zuen lehenengoz, Nagore Kortarekin. Ondoren, Gari Lizarraga lagunarekin jo zuen urte askotan. Egun, Imanol Intxausti segurarrarekin jotzen du. «Erromeria formatuarekin herrietako bihotzera heltzen zara», dio.
Argazkia: Josu Perez.
Argazkia: Josu Perez.
Argazkia: Josu Perez.
Argazkia: Josu Perez.
