Larunbat arratsaldean Urretxuko Eire tabernaren urteurren festan joko du
Uxue Kerejeta musikari zumarragarrak Amaiera diskoa kaleratu du. Larunbatean, 19:00 aldera, kanta batzuk joko ditu Urretxuko Eire tabernaren urteurren festan. Gainera, nahi dutenek diskoa eskuratu ahal izango dute.
Kerejeta umetatik da musikazalea. «Aitaitarekin Arrate Irratian trikitixa entzuten nuela esaten dit beti amak. Musika eskolara joan naiz, dantza egiten nuen…». Musika eskolan soinua eta panderoa jotzen ikasi zuen. 15 bat urterekin gitarra jotzen hasi zen, bere kasa. Eta ikasketak bukatu zituenean, pianoa jotzen hasi zen. «Bergarako musika eskolan soinu eta pandero irakaslea naiz. Gitarra eta pianoa, berriz, hala moduz jotzen ditut. Katekesis bertsio taldean jotzen nuen eta gitarrak inbidia handia ematen zidan. Akorde batzuk ikasi nituen, kantatzea ere gustatzen zait, sortzeko gogoa nuen… eta abesti batzuk egin nituen».
Hala, lehen kontzertuak eman zituen. Orain, berriz, diskoa argitaratzera animatu da. «Duela hiru bat urte, kantek egitura politagoa zutela, melodiari dagokionez zerbait gehiago zutela… ikusi nuen eta poliki-poliki kantei forma ematen hasi nintzen. Iazko udan diskoa grabatzea erabaki nuen», aipatu du.
Diskoari izenburua jartzea apur bat kosta zitzaion. «Izenburua behar zuen, baina jarri nion lehenengoa ez zitzaidan gustatu. Jartze hutsagatik jarri nuela konturatu nintzen. Abesti guztien hitzak mahai gainean jarri nituen eta kanten zentzua bilatu nuen. Gauza ezberdinen amaierari idatzi niola konturatu nintzen eta, beraz, diskoari Amaiera izenburua jarri nion».
Pop estiloko diskoa da. Hitzak ere bereak dira. «Hitzak ez dira oso landuak, beharbada, baina hori atera zait. Ez dira ez onak eta ez txarrak. Nireak dira. Niri gertatu zaizkidan gauzei, jendeari, sentimenduei, bizitzarekiko eta ingurukoekiko maitasunari… idazten diet».
Aurrerago, Urretxun
Diskoa inguruko musikariekin grabatu du. «Gitarra akustikoa eta ahotsa nik grabatu dut. Gitarra elektrikoa Itsaso Larrañagak grabatu du, baxua Pedro Gonzalez musika eskolako irakasle leondarrak, teklatua Beñat Armentiak eta perkusioa Javi Castañok. Bestalde, hiru kolaborazio berezi izan ditut: Ianire Aranzabe, Idoia Asurmendi eta Joseba Loinaz pianista. Diskoko argazkiak eta diseinua Andoni Clavok egin ditu».
Diskoa Zestoako Gaztain estudioan grabatu zuten, Eñaut Gaztañagarekin. «Inguruko jendeak berari buruz hitz egin zidan. Hala, bertara jotzea erabaki nuen. Etxetik gertu dago, gainera».
Diskoa kontzertuetan salduko du. «Larunbat honetan abesti batzuk joko ditut, bakarka, Eire tabernaren lehen urteurrenean. Diskoaren aurkezpena datorren astean egingo dut: ostiralean, 20:00etan, Tolosako Intujai espazioan eta larunbatean, 12:00etan, Zumarragako Otxaran dendaren kanpoaldean. Tolosan eta Zumarragan taldeko beste partaide bat egongo da. Aurrerago banda guztiarekin joko dut, Urretxun. Aurkezpen kontzertu ofiziala izango da».
Bukatzeko, lagundu dioten guztiei eskerrak eman nahi dizkie. «Etxekoek eta lagunek asko lagundu didate», amaitu du.
