Erasmus+ egitasmoaren barne elkartrukea egiten ari diren Urretxuko eta Schwarzenbruck-eko (Alemania) gazteak Urretxun elkartu dira oraingoan. Atzo alemaniarrei harrera egin zieten udaletxean. Ondorengo egunetan sormena landuko dute.
Santa Barbaran bazkaldu zuten, ondoren lan saio bat egin zuten portaloian eta, bukatzeko, han bertan afaldu zuten Buen Bokadoren eskutik. Gaur Bilbora joan dira. Guggenheim museoa eta Arriaga antzokia kanpotik ikusiko dituzte eta Alhondiga, Kafe Antzokia eta BilboArte bisitatuko dituzte. Kafe Antzokian bazkalduko dute eta Santa Barbara aterpetxean afaldu.
Bihar Urretxu eta Ezkio ezagutuko dituzte. Irimon argazki lehiaketa egingo dute eta zianotipiarako materiala bilduko dute eta Igartubeiti baserria bisitatuko dute. Baserrian sagar zuku, txalaparta eta zianotipia saioak egingo dituzte. Bertan bazkalduko dute, Buen Bokadoren eskutik. Afaria, berriz, Navarro jatetxean egingo dute.
Igandean pintxo, paella eta postre lehiaketa egingo dute Gazte Bideanen. Ondoren, Madaia elkartean beraiek prestatutakoa jango dute. Arratsaldean giza futbolin lehiaketa jokatuko dute eta gorputz perkusio eta batukada ikastaroak egingo dituzte. Ondoren, Collin’s tabernan afalduko dute.
Astelehen goizean Urretxuko Smartlog enpresa eta Ormaiztegiko Irizar enpresa bisitatuko dituzte. Ondoren, Beasaingo Salbatore hotelean bazkalduko dute. Arratsaldean Lazkaoko Iztueta esnetegia bisitatuko dute. Santa Barbara aterpetxean afalduko dute.
Asteartean Donostiara joango dira. Tabakalera bisitatuko dute eta Stop Motion eta argitalpen artistiko ikastaroak egingo dituzte. Ondoren, alde zaharreko Juantxo tabernan bazkalduko dute. Portaloian afalduko dute, Buen Bokadoren eskutik. Asteazkenean lizeoa eta institutua bisitatuko dituzte. Ondoren, Alemaniara itzuliko dira.
