Bederatzi ebakuntza gela eta minaren unitatea izango ditu, besteak beste
Osakidetzak Zumarragako ospitaleko bloke kirurgiko berriaren obra hasi du. Eraikinak bederatzi ebakuntza gela (egun sei daude), minaren unitatea, hemodialisirako 18 postu, endoskopietarako 14 postu eta esterilizazio gela izango ditu, besteak beste. Zerbitzu batzuk eraikin berrian emango direnez, egungo eraikinetan emango direnak handitu egin ahal izango dira. Larrialdietakoa, adibidez. Eraikin berriaren aurrekontua 75 milioi eurokoa da eta 2028ko abendurako prest egotea espero da.
Bloke kirurgiko berria ospitalearen fatxada nagusiaren aurrean eraikiko da. Pasabideak izango ditu, egungo eraikinarekin konektatzeko. 17.000 metro koadroko zabalera izango du, zortzi solairutan banatuta. Asistentziara bideratutako bost solairuek 10.000 metro izango dituzte guztira: 2.000 metro bakoitzak. Gainerako hiru solairuak aparkalekurako eta eraikineko instalazio teknikoetarako erabiliko dira.
-1 eta -2 solairuetan eraikinaren instalazio tekniko nagusiak eta 60 aparkaleku izango dira. Beheko solairuan 18 hemodialisi postu, hiru kontsulta, erizaintzako kontrola, 200 lagunentzako ekitaldi aretoa, 150 metro koadroko kafetegia, arreta gunea eta itxarongela izango dira.
Lehen solairuan minaren unitatea (bi kontsulta eta tratamendu gela), eguneko ospitale medikoa (zortzi postu) eta lau endoskopia gela (14 posturekin) egokituko dituzte. Bigarren solairuan lau ebakuntza gela, eguneko ospitale kirurgikoa (22 postu) eta erizaintzako kontrola izango dira. Hirugarren solairuan esterilizazio gela berria egongo da.
Beste bost ebakuntza gela
Laugarren solairuan bost ebakuntza gela, anestesia osteko sendaketarako 14 postu eta pazienteak prestatzeko gunea egongo dira. Bukatzeko, bosgarren solairuan instalazioak egongo dira (beroketa sistema eta aire girotua, besteak beste).
Alberto Martinez Osasun sailburuak eta Lore Bilbao Osakidetzako zuzendari nagusiak azpiegitura berria aurkeztu dute gaur eguerdian, Laura Agirre Goierri-Urola Garaia ESIko zuzendari kudeatzailearekin batera.
Sailburuaren iritzia
Martinezek eraikin berriak egungo azpiegiturak nabarmen hobetzea ahalbidetuko dituela esan du. Gainera, itxaronaldiak murriztuko dira, zirkuitu asistentzialen eta logistikoen hobetzea ekarriko baitu. «Osasun arreta etengabe hobetzearen eta ongizatean haztearen aldeko apustu irmoa da, bai hemen lan egiten duten pertsonentzat, bai gure pazienteentzat. Inbertsio handia da, ospitale moderno, funtzional eta prestatuago bat lortzeko eta herritarren egungo eta etorkizuneko beharrei erantzuteko». Horretaz gain, Zumarragako ospitaleak Gurutzetakoak bezainbeste endoskopia gela izango dituela eta hemodialisi unitatea duen eskualdeko ospitale bakarra dela gogoratu du.
Aurkezpenari ekin aurretik, sailburua ESIko zuzendaritza taldearekin eta langileekin elkartu da, lehen mailako arretaren zein ospitaleko arretaren egoera bertatik bertara ezagutzeko. Bilera horretan Bilbaok eta Gontzal Tamayo Osasun sailburuordeak, Aritz Uriarte Administrazio eta Finantzaketa Sanitarioko sailburuordeak eta ESIa osatzen duten udalerrietako alkateek ere parte hartu dute. ESIak Goierri eta Urola Erdia hartzen ditu eta 100.000 pertsona ingururi ematen die zerbitzu.
Eraikin berria nolakoa izango den erakusten duten irudiak: Estudio Beldarrain.
Obra, urriaren 17an. Argazkia: Gotzon Aranburu.
