Urretxuko Udalak, Aniztasun eta Bizikidetzarako II. Planaren barne, aniztasun funtzionala mahai gainean jarri nahi du. Aniztasun funtzionala duten pertsonen eta haien ingurukoen errealitateari, eskubideei, gaitasunei, beharrei eta komunitatean jasaten duten diskriminazioari buruzko ezagutza eta hausnarketa sustatu nahi ditu. Horretarako, hiru ekintza antolatu ditu: dokumental emanaldia, dantza saioa eta giza liburutegia.
Joan zen astean Isiltasunetik mundura dokumentala eman zuten. Gaur, berriz, Bakuntza aisialdi elkarteak dantza saioa egin du. Familiei zuzenduriko ekitaldi hori Gernikako Arbola plazan egin dute eta herritar asko elkartu ditu. Bakuntzaren helburua aisialdi egokitua eta hezitzailea eta osasuna sustatzea da. Aniztasun funtzionala duten haur, nerabe eta helduek parte hartzen dute.
Bukatzeko, hilaren 20an giza liburutegia egingo dute. 17:00etan izango da, liburutegian. Ekintza horretara gerturatzen direnek bertan egongo diren pertsona- liburuekin 15 minutuz solasean aritzeko aukera izango dute. Bertan entzungo dituzten istorio eta bizipen pertsonalen bitartez aniztasun funtzionala oinarri dituzten aurreiritziak gainditu eta beste errealitate batzuk ezagutzeko aukera izango dute. Ekintza honetako protagonistak aniztasun funtzionala duten pertsonak, haien familiak eta hezitzaileak izango dira.
