Urretxu eta Zumarragako udalek Gabonetako erakusleiho lehiaketaren 20. edizioa aurkeztu dute. Izena emateko epea bihar (ostirala) irekiko dute eta nahi duten merktari guztiek parte hartu ahal izango dute.
Parte hartu nahi duten establezimenduek azaroaren 29a baino lehen eman behar dute izena, Urola Garaiko Merkataritza Bulego Teknikoan: Urretxuko Labeaga kaleko 56an. Erakusleihoak abenduaren 1erako prest egon beharko dira eta 16ra arte ikusgai. 21:00ak arte izan behar dituzte argiztatuta. Erakusleihoan establezimenduko ohiko produktuak nagusitu behar dira.
Epaimahaia bost kidek osatuko dute: Gipuzkoako Merkataritza Federazioko ordezkariak, merkataritzako bulego teknikoko ordezkariak, Urretxuko Udaleko ordezkariak, Zumarragako Udaleko ordezkariak eta Zumarragako arte ederretako eskolako edo Urretxuko arte tailerreko ordezkariak. Epaimahaiko kideek irudimena, originaltasuna, mezua, kalitate estetikoa eta erakusleihoak Gabonetako giroarekin duen lotura baloratuko dituzte.
Lau sari banatuko dira. Irabazleak diploma, Bertatik Bertara produktuen saskia eta 200 euroko erosketa bonoa eramango ditu etxera. Bigarren saria jasotzen duenak, diploma, Bertatik Bertara produktuen saskia eta 100 euroko erosketa bonoa. Hirugarren saria eta herritarren saria jasotzen dutenek, berriz, diploma eta Bertatik Bertara produktuen saskia eramango dituzte etxera. Epaimahaiak aipamen berezia ere eman dezake, ezaugarri bereziren bat duen erakusleihoari.
Herritarren parte hartzea
Herritarren saria Bi-Tartean merkatari elkarteak kudeatuko du. Herritarrek abenduaren 15era arte bozkatu ahal izango dute, elkarteak ezarriko duen sistemaren bidez. Bozka ematen duten guztien artean 100 euroko bonoa zozkatuko dute.
Sari banaketa ekitaldia abenduaren 18an izango da: 13:30ean, Zumarragako udaletxean. Aurten, berrikuntza gisa, irabazleen izenak ez dira aurretik ezagutuko, ekitaldian bertan baizik. Helburua jakin-mina piztea eta sarituek beraien poza gainontzeko guztiekin partekatzea da.
Gabonetako erakusleiho lehiaketa gaur eguerdian aurkeztu dute, Urretxuko udaletxeko areto nagusian. Ekitaldian Jon Luqui Urretxuko alkateak eta Mikel Serrano Zumarragako alkateak parte hartu dute. Beraiek arduratu dira lehiaketako oinarriak aurkezteaz. Ondoren, Sandra Rodriguez eta Cristina Garces Bi-Tartean elkarteko zuzendaritzako kideekin argazkia atera dute.
Bi alkateek merkatariek bi herrien alde egiten duten lana goraipatu dute. Esker onez, merkatariei laguntzen saiatzen dira. «Gabonetako kanpaina garrantzitsuena da merkatarientzat eta udalok ahalegina egiten dugu herritarrek herrian kontsumitu dezaten. Horretarako, Gabonetako argiak jartzen ditugu eta lehiaketa hau antolatzen dugu, besteak beste», esan du Luquik. Aurten, Gabonetako argiak azaroaren 28an piztuko dituzte.
20. edizioa
Urretxuko alkateak erakusleiho lehiaketaren 20. edizioa izango dela gogoratu du. «20. ediziora heltzeak balioa du. Parte hartzea nabarmena izaten da. Bi udalok gure babesa eskaintzen jarraituko dugu, merkataritza sektore ekonomiko garrantzitsua baita», aurreratu du.
Serranok ere eskerrak eman dizkie merkatariei. «Bi-Tarteani eskerrak eman nahi dizkiot, halako ekimenak antolatzeko egiten duen lanagatik. Lehiaketa hau erabat kontsolidatuta dago eta hori udalok merkatariekin dugun harreman estuaren islada ere bada».
Merkatariak aurtengo lehiaketan ere parte hartzera animatu ditu. «Urtero 30-35 establezimenduk parte hartzen dute. Merkatari askok egiten dute ahalegina. Aurten ere parte hartzera animatu nahi ditugu».
