Euskalgintzaren Kontseiluak Pizkundea ekitaldia antolatu du abenduaren 27rako. Helburua milaka euskaltzale elkartzea da, euskararen aldeko aro berri bati hasiera emateko. Bilbao Arenan egingo da, 17:00etan hasita. Zintzo Mintzok bere alea jarri nahi izan du eta Urretxu-Zumarragako euskaltzaleei Bilboko ekitaldian parte hartzera dei egiteaz gain, autobusa ere antolatu du joan-etorrirako. Autobusa 15:00etan aterako da Zumarragako geltokitik eta doan izango da. Autobusean lekua erreserbatzeko 679 49 42 89 zenbakira idatzi behar da.
Euskarak, hizkuntza guztiek bezala, etorkizunik izango badu unibertso bat behar du, zentzua emango dion irudi eta erreferentzia mundu bat. Eta unibertso hori kultura da, euskarazko kultura, zailtasun gehigarriak erantsiko dizkietela jakin arren, euskaraz sortzen duten kulturgileek eskaintzen diguten unibertsoa. Beraz, kultur kutsukoa izango da ekitaldia, eta euskal artistek eta musikagileek, euskararen soinu-bandak, dantzak, antzerkiak eta bertsoek presentzia nabarmena izango dute. Guzti hori, mezu argi baten baitan: Euskararen etorkizuna jokoan dago, euskaltzaleon garaia da!
Ekitaldian parte hartuko dutenen artean Amets Aranguren, Anari, Ane Labaka, Edurne Azkarate, Flako Fonki, Gontzal Mendibil, Gorka Urbizu, Itziar Ituño, Joseba Tapia, Miren Narbaiza, Ramon Agirre eta Sustrai Colina daude. Ekitaldirako sarrerak www.pizkundea.eus atarian daude eskuragarri.
