Gurrutxagaazpikoa baserriko Xabier Zalduak 31 urte egin ditu San Tomas egunean. San Jose ikastetxean egin zituen oinarriko ikasketak, etxetik gertu, eta ondoren La Salle-Legazpin Lanbide Heziketa egin zuen.
Eraikuntzan lan egin zuen, baina egun Arcerlor-Mittal enpresako langilea da. Hondeatzailearekin lan egiten du. Igande honetako gizon-proban parte hartuko du, Zumarragako taldearekin, baina aizkorarekin aritzea nahiago du. Iaz ekin zion serio eta bere ametsa egunen batean Lehen Mailara heltzea da.
Zer izan nahi zenuen umetan?
Beti hondeatzaileekin, kamioiekin… ibiltzen nintzen. Beraz, egun naizena.
Aisialdian zer egitea atsegin duzu?
Aisialdia aizkorarekin entrenatzeko erabiltzen dut. Astean sei egunetan entrenatzen dut, Lazkaoko Kemen zentroak gidatuta.
Bizitzeko toki bat?
Antio.
Nolatan halako herri-kirol zaletasuna?
Gurrutxagan idi-proba zaletasuna izan da beti, baina gainontzekoak ere jarraitu dira. Umetan aitonarekin basora joan eta aizkorarekin ibiltzen nintzela gogoratzen dut. Aitarik izan ez dudanez, inork ez nau bultzatu.
Zein duzu herri-kirolik gustukoena?
Aizkora asko gustatzen zait, baina idi-proba etxeko tradizioa da.
Zer diozu gizon-probaz?
Aizkora eta gizon-proba ez dira bateragarriak eta datorren urtean ez dut parte hartuko.
Batzuek astakeria dela diote.
Egungoa ez dago duela 30 urtekoarekin alderatzerik. Tiratzen hasi aurretik, hilabete eman dugu gorputza prestatzen. Iaz ez genuen batere sufritu.
Ezkio-Itsaso, Legazpi eta Urretxu. Nori diozue beldur?
Denak oso ondo prestatuta helduko dira, baina argi Legazpirekin! Gogo handiarekin ikusten zaie.
Ilehoriak ala beltzaranak?
Beltzaranak.
Egindako azken oparia?
Hozka egiteko jostailua, semeari.
Eta jasotakoa?
Emazteak oparitu zizkidan aizkoran egiteko zapatilak.
Data bat?
Umea jaio zen eguna: uztailak 16.
Neska eta mutil izen bana?
Maider eta Jon, emaztearena eta semearena.
Zein egunkari irakurtzen duzu?
Normalean DV.
Gustuko telebista saioa?
Telebista gutxi ikusten dut. Normalean albistegiak eta Viajar katea ikusten ditut.
Bereziki gorroto duzuna?
Gran Hermano.
Pelikula bat?
Rocky eta halakoak gustatu izan zaizkit.
Liburu bat?
Ez dut libururik irakurtzen, horretarako pazientzia gutxi dut.
Soinu bat?
Goizeko txori soinua.
Usain bat?
Kafe egin berriarena.
Janari bat?
Babarrunak, odolkiarekin eta gainontzeko guztiarekin.
Ura ala…
Ardoa.
