Amaia Iturriotz urretxuarrak ‘Iparragirre’ sarietako bat irabazi du: bertsopaperei dagokiena, 16 urte artekoen mailan.
Iturriotz DBHko 4. maila egiten ari da lizeoan eta zortzigarren urtea du herriko bertso eskolan. “Batez ere bertako giro onagatik” jarraitzen duela dio. Denbora honetan guztian makina bat sari irabazi ditu. Asteburu honetan ‘Martxoan Bertsoa’ ekimeneko bertsolari txapelketa hasiko da eta Amaiak ere parte hartuko du. Literatura ere gustuko du eta saskibaloian jokatzen du Goierri kirol elkartearekin.
Zer izan nahi zenuen umetan?
Ezer ere ez bereziki. Boladaka gauza bat edo bestea esango nuela pentsatzen dut.
Aisialdian zer egitea atsegin duzu?
Bertsotan egitea eta lagunekin egotea.
Bizitzeko toki bat?
Urretxu.
Gustuko bertsolaria?
Mendiluze, Egaña nori ez… Sustrai Colinarekin geldituko naiz, azkenaldian primeran dabil eta. Gazteagoen artean Maialen Arzallus gustatzen zait.
Norekin abestuko zenuke gustura?
Oraingoz ez nuke horietako inorekin kantatuko…
Gustuko doinua?
Badaude sarritan erabiltzen ditudan batzuk, baina ez dakizkit izenak.
Gogoratzen al duzu bereziki hunkitu zaituen bertso bat?
Askok hunkitu naute.
Zer nahiago duzu, bat-batean aritzea ala idaztea?
Bertsoak idazteko orduan ez dago urduritasunik, baina nahiago dut bat-batean aritu. Beharbada urduritasun horrek berak sortzen duen zirraragatik.
Bertsoak idazteko orduan, zer gai atsegin dituzu?
Beti gai ezberdinak jorratzen saiatzen naiz, baina hori lortzea oso zaila da.
Ilehoriak ala beltzaranak?
Biak.
Egindako azken oparia?
Aitari bere urtebetetze egunean egindako bertsoa.
Eta jasotakoa?
Urtebetetze egunekoak. Urtarrilaren 6koa naiz.
Data bat?
Euskal Jaia.
Neska eta mutil izen bana?
Olaia eta Asier.
Zein egunkari irakurtzen duzu?
Etxean hartzen duguna: Berria.
Gustuko telebista saioa?
Hospital Central.
Bereziki gorroto duzuna?
Futbola, baina etxean sarritan ikustea tokatzen zait.
Pelikula bat?
Besterik gabe ikusten ditut.
Liburu bat?
Duela gutxi Bi anai irakurri dut eta asko gustatu zait. Dena den, irakurtzen bertsotan baino denbora gutxiago ematen dut.
Soinu bat?
Itsasoarena.
Usain bat?
Oilasko errearena.
Janari bat?
Makarroiak. Amamak egindakoak, batez ere.
Ura ala…
Ura.
