Urretxuko eta Zumarragako Goiargi abesbatzak Udazkeneko Musika Zikloko azken kontzertua egingo du igandean, 19:00etan, Urretxuko San Martin de Tours elizan. Emanaldiaren lehen zatian musika sakroa eskainiko dute eta bigarrenean musika herrikoia.
Udazkeneko Musika Zikloa Goiargi abesbatzak berak antolatzen du, Urretxuko Udalaren eta aldundiaren laguntzarekin. Aurtengo edizioa 29.a da. «Zikloa jendearen erantzunaren arabera aldatu da. Hasieran kontzertuak larunbatetan egiten ziren, adibidez», dio Jabier Arratibel Goiargiko zuzendariak.
Aurtengo edizioa «oso ona» izan dela dio. Urtero Tolosako lehiaketara etorri den abesbatza batek parte hartzen du. Aurten, AEBko Portland State University abesbatza etorri da. «Oso kontzertu polita eskaini dute. Tolosatik etortzen diren abesbatza guztiek maila altua ematen dute. 29 urte hauetan mundu guztiko abesbatza bikainak pasa dira Urretxutik, baina jendeak 1990eko hamarkada hasieran etorri zen Letoniako korua gogoratzen du oraindik. Eszenografia asko zaindu zuten eta garai hartan ez zen batere arrunta».
Tolosan nagusitu diren abesbatza askok abestu dute Urretxun. «Aurreko urteetan Tolosan saritutako abesbatzak etorri dira. Izan ere, hango sariak banatzen dituzten egun berean etortzen dira hona».
Euskal Herriko abesbatzak ere gonbidatzen dituzte. Aurten, Arrasateko Txorbela otxoteak abestu du Urretxun.
«Lehenengoz, gizonezkoek bakarrik osatutako talde bat ekarri dugu. Urtero zerbait ezberdina ekartzen saiatzen gara eta kontzertu oso ona eman zuten».
Goiargik igande honetan egingo duen kontzertuari buruz, urtero programa berritzen saiatzen direla aipatu du. «Herritar asko herrian ematen ditugun kontzertu guztietara etortzen dira eta emanalditik emanaldira gauzak aldatzen saiatzen gara».
Igandeko kontzertua
Igandeko emanaldiari dagokionez, lehen zati osoa berria izango da eta bigarren zatiko abesti batzuk ere bai. «Lehen zatian meza erromantiko bat abestuko dugu da eta bigarren zatian musika profanoa eta folklorea eskainiko ditugu», aurreratu du.
Zumarragar honek 21 urte daramatza jada Goiargi abesbatza zuzentzen. «Bai nik eta bai taldeak gorabeherak izan ditugu, baina ilusioa dugun bitartean, jarraitu egingo dut».
Izan ere, Goiargi bere bigarren familia da dagoeneko. «21 urte hauek oso onak izan dira eta jendea lanerako gogoarekin etortzen da entseguetara. Etorkizunera begira erronka politak ditugu eskuartean eta gure arteko harremana oso estua da», amaitu du Arratibelek.
