Sasieta Mankomunitateko zabortegiaren itxieraren harira Mikel Serrano Zumarragako alkate sozialistak Bilduk zabortegiaren egoera zein den ezkutatzen duela esan du, baita haren etorkizunaren gainekoa ere: «Informazioa lortzeko trabak jarri ditu, hala informazio teknikoa nola ekonomikoa».
Serranok jakin nahi du, «egoera zuzentzeko neurririk zergatik ez den hartu». Zabortegia ixteaz batera, sei hilabeteko epean berriz irekitzeko plan baten diseinua egin dutela dio, «txosten juridikorik gabe eta Sasietako teknikariak bazter utzita». Irekiera horrek 2.500.000 euroko kostua izango lukeela dio Zumarragako alkateak, eta galdetu du, «herritarren tasatik aterako dute? Zenbat ordaindu beharko du herritar bakoitzak?». Bilduk gaiari buruzko isiltasuna «muturreraino» eraman duela esan du: «Ez baitute azaldu ere egin aurrerantzean zabortegira eramaten ditugun hondakinak nora joango diren».
Bildu Sasietako Mankomunitatearen buru izan den lau urteotan, «kudeaketa negargarria» egin duela gehitu du: «Ez dute zabortegia Eusko Jaurlaritzak ezartzen dituen ingurumen eskakizunetara egokitu».
Serranok dioenez, «beste alde batera begiratu dute eta atez atekoa glorifikatu duten bitartean, hondakinen itxiera tratamendua ez dute kudeatu». Serranoren hitzetan «arbuiagarriena» da, «hala Mankomunitateak nola Aldundiak zabortegiaren egoera eskasaren berri bazutela, eta, hala ere, Gipuzkoako zabortegia bilakatu nahi izan dutela».
Bilduri Gipuzkoan «gobernatzen utzi» izanaren erantzule egin du EAJ Serranok, «orain konturatu dira beren hautua zeinen kaltegarria izan den».
