Erostarbe urretxuarrak errepikatu egingo du Goñiren Omenezkoan

2015/02/17

Otamotz

Xabier Erostarbe pilotari urretxuarra aurten ere arituko da Goñiren Omenezkoan. Bihar ekingo diote Xabier Goñi pilotari zumarragarraren omenezkoaren 24. ekitaldiari. Astero-astero partida bana jokatuko dute lau t’ erdiko promesetan eta senior binakoan Zumarragako Beloki pilotalekuan. Iaz urretxuarrak ez zuen txapela jantzi baina finala jokatu zuen Artolarekin batera. Ez da Goñiren Omenezkoan aurten arituko den goierritar bakarra. Ander Quina zumarragarrak parte hartuko du eta Iker Irribarri aramarrak ere jokatuko du berriki granatez margotutako Beloki pilotalekuan. Urtero afizionatuetan puntan dabiltzan pilotariak biltzen dira Goñiren Omenezkora. Iñigo Viana Beloki pilota elkarteko kideak osatzen du kartela beste kide batzuekin batera: «Lurraldez lurralde pilota federazioek antolatzen dituzten txapelketetan aritzen diren pilotariei erreparatzen diegu. Baita handik Euskal Ligara iristen direnei eta txapelketa pribatuetan txapelak janzten dituztenei ere». Horiei guztiei begiratuta, ondoen dabiltzan pilotari amateurrak Goñiren Omenezkoan egon daitezen saiatzen dira, eta lortu ere. Iaz parte hartu zuten pilotarietatik lauk eman dute profesionaletarako saltoa, eta ez nolanahikoa gainera. Hain zuzen, lau pilotari horiek Altuna, Artola, Urruzola eta Irusta dira. Bikoteak ere Belokikoek osatzen dituzte jokalari bakoitzaren ezaugarriak aintzat hartuta.Aurten, Gipuzkoako pilotariak dira gehienak. Promesetan antzera egiten dute, eta jubeniletan indartsu ari diren jokalariak Belokira ekartzen saiatzen dira. Vianaren hitzetan, «finean, han eta hemen maila onena ematen ari diren pilotariak ekartzen ditugu». Goñiren Omenezkoaren barruko partiden aurretik Belokik antolatutako Lehiaketa Herrikoiaren final laurdenak, finalerdiak eta finalak jokatuko dira Beloki pilotalekuan. KARTELA Partidak asteazkenetan jokatuko dira Zumarragako Beloki pilotalekuan, 18:30etik aurrera. Bihar