Goierri garaiko Uggasa garapen agentziako turismo sailak plazaratu ditu udako bisitari datuak. Kopuruak gorako joerari eutsi dio; aurtengo oporraldian 15.550 lagunek bisitatu dute bailara. Turista kopuruak gora egiteaz gain, gehiago izan dira gaua bertako ostatuetan igaro dutenak.
Edurne Etxeberria turismo arduradunak igoera hori bisitarien soslaian sumatutako aldaketarekin lotu du: «Inaziotar Ibilbidea egiten ari diren erromes kopuruak gora egin du eta barrualdera jo duten turistek ere bertan ostatua hartzeko joera erakutsi dute». Goierri garaiko ostalariek, gainera, Interneten gero eta presentzia gehiago izateak mesede egiten diela gehitu dute.
Turismo sektorean lanean ari direnen arteko elkarlanari azpimarra egin dio Etxeberriak: «Gipuzkoara etorri direnen kopurua hazi egin da eta eguraldi onak ere lagunduko zuen, baina profesionalen elkarlanik gabe ez genituzkeen halako datuak lortuko». Elkarlan hori urte osoan lantzen dute ikastaroen eta hitzaldien bitartez.
Uztailean eta abuztuan Goierri garaiak hartu dituen bisitariei Antioko Interpretazio Zentroko turismo bulegoan eta Legazpiko Mirandaolako turismo bulegoan eman diete bailarari buruzko informazioa. Bulegoak egunero egon dira irekita eta han eman diete bertako museoei zein zentroei buruzko informazioa.
Baliabideak eta ostatuak
Hain zuzen, handik bideratu dituzte Aikur erle museora (Urretxu), Burdin Haranaren baitako baliabideetara (Legazpi), Antioko baselizara eta interpretazio zentrora (Zumarraga), Igartubeiti baserri museora eta Pott Zeramikara (Ezkio-Itasaso), Tourseko Martin Deunaren elizara edota Urrelur museora (Urretxu). Baliabideen berri emateaz gain, Hiru Tenpluen Ibilbidea zein Inaziotar Ibilbideari buruzko xehetasunak azaldu dizkiete. Bide batez, bailaran ostatua hartzeko dauden aukera ezberdinen berri ere eman diete.
Herrialde Katalanetako bisitariak eta madrildarrak izan dira, ohi bezala, gehienak. Beste lurralde batzuetakoak gehituz gero, bisitari kopuruaren %60 batu dute. Kostaldean ostatua hartu eta barrualdera txangoak egiten dituzten turistak izan ohi dira. Urrunagotik iritsitakoak %5 izan dira; batik bat, Inaziotar Ibilbideak erakarri ditu, baita naturari zuzenean lotutako ekintzek ere. Azken bi baliabideok erakarri dituzte gehien gaua igaro duten bisitariak.
Urretxuko Santa Barbara aterpetxean, Legazpiko Mauleon hotelean, Pastain nekazal turismoan eta Lakiola kanpinean zein Zumarragako Etxeberri hotelean eta Urola pentsioan iaz baino bisitari gehiagok egin du gaua.
