Urretxuko Udalak Mugitur ekimenarekin bat egin du. Egitasmo honen helburua bizilagunen artean bizimodu osasuntsua eta aktiboa sustatzea da. Horretarako, ariketa fisikoa egiteko ohitura ez duten herritarrei aholkularitza eta orientazio zerbitzua eskainiko diete.
Zerbitzua doakoa da. Erabili ahal izateko, zuzenean orientatzaileari deitu daiteke eta txanda eskatu edo gizarte zerbitzuetara jo. Lehen hitzorduan orientatzaileak kasua aztertu eta eskatzailearen behar, baliabide eta lehentasunen araberako programa prestatuko du.
Bilerak
Urretxuko orientatzailea Aimar Ibarzabal da. Telefono zenbakia 943 03 80 92 da eta helbide elektronikoa mugitur@urretxu.eus. Herritarrak kultur etxean hartuko ditu, astelehenetan 16:30etik 17:30era eta asteazkenetan 12:00etatik 13:00etara eta 16:30etik 17:30era.
Egitasmo honek udal kirol zerbitzuaren, gizarte zerbitzuen, aniztasun eta bizikidetza mahaiaren, aldundiaren, jaurlaritzaren eta udalaren babesa du. Dagoeneko aniztasun eta bizikidetza mahaian parte hartzen duten hamabost bat lagunek parte hartzeko asmoa azaldu dute.
Aurkezpena atzo egin zuten, udaletxean. Ekitaldian Maialen Fidalgo zinegotziak, Osasun saileko Mikel Azpirik, Iker Etxeberria Mugiment egitasmoko idazkari teknikoak, Iñaki Iturriotz Gipuzkoako Foru Aldundiko Kiroletako zerbitzuburuak, Monica Leiva aniztasun eta bizikidetza mahaiko koordinatzaileak eta Ibarzabalek parte hartu zuten.
Osasuna ez dela gaixotasun eza gogoratu zuen Fidalgok: «Osasuna ongizate fisiko, sozial eta mentala izatea da». Azpirik sarean lan egingo dela azpimarratu zuen, erakunde ezberdinek eta udaleko sail ezberdinek parte hartuko baitute. Iturriotzek Gipuzkoako emakumezkoen %34k eta gizonezkoen %32k ez dutela behar bezainbeste ariketa fisiko egiten aipatu zuen.
Aniztasun eta bizikidetza mahaiko kideak dira kirola egiteko asmoa azaldu duten lehenak. Ibarzabal atzo hasi zen beraiei deitzen. Galdetegi bat erantzungo dute eta ondoren Ibarzabalek ondoen datorkien jarduera diseinatuko die. Hilabete batzuk barru kirola beraien kabuz egitea da helburua.
