Mariñelarenaren lanak uztailean eta abuztuan egongo dira ikusgai. Hiriarekin zerikusia duten elementuak zintzilikatu ditu. Lanak konfinamenduan egindakoak dira
Iñaki Mariñelarena artista zumarragarrak Urbs erakusketa ireki du Urretxuko Buhame tabernan. Bertan, hiriko bizimoduarekin zerikusia duten lanak ikus daitezke.
Erakusketa honetako lanak pinturaren eta eskulturaren erdibidean daude. «Pieza gehienak margotutako eskulturak dira. Hormetan jartzeko eginak daude, koadroak izango bailiran».
Material ezberdinak erabili ditu. «Poliuretanozko panelak erabili ditut, adibidez. Panel hauek etxegintzan erabiltzen dira, isolatzeko. Birziklatutako objektuak ere erabili ditut. Muntatu eta ondoren margotu egin ditut», azaldu du Zumarragako artistak.
Urbs hitzak hiria esan nahi du, latinez. «Ez dut urban hitza erabili nahi izan, hitz hori oso erabilia baitago dagoeneko. Gainera, Rosaliari edo trap-ari keinu bat egiten niola eman zezakeen eta ez litzateke hori nire asmoa».
Urbs hitza erabili izanaren arrazoia beste bat da. «Erakusketan hirietan aurki ditzakegun elementuak ikus ditzakegu: estolda bat, edukiontzi bat, garaje baten sarrera… Ez da kaleko artea, kaleko gaietan oinarritutako barrualderako artea baizik. Kaleko artea kalean egiten dena da. Ahal izanez gero, autoritateen baimenik gabe».
Kaleko artea
Berak ez du sekula kaleko artea egin. «Gustatuko litzaidake, baina jendearen aurrean lan egiteak lotsa ematen dit. Nahiago dut etxean lan egin, bertan ez bainau inork ikusten. Lan egiten dudan bitartean bideoa grabatzea pentsatu izan dut, nola lan egiten dudan erakusteko, baina bideoaz gogoratzen naizenerako lanaren erdia egina dut».
Buhame tabernan ikusgai jarri dituen lanetako asko konfinamenduan egin zituen. «Duela bi urte hanka bat hautsi nuen eta bi hilabete eman nituen etxean. Bi hilabete haietan egindako lanekin ere erakusketa bat egin nuen. Konfinamenduak pelikulak eta telesailak ikusteko eta postreak egiteko aukera bikaina eskaini digu, baina sormenerako ere egokia izan da», amaitu du Mariñelarenak.