Aimar Ibarzabal urretxuarrak 5 urte daramatza bere herriko igerilekuan sorosle lanetan, baina ez zaio inoiz egokitu aurtengoa bezalako egoera ezohiko batean lan egitea.
Aimar Ibarzabal urretxuarra sorosle lanetan // A.Garmendia Dagoeneko sorosle lanetan zure bosgarren urtea izanda, zer moduzko esperientzia ari da izaten egoera ezberdin honetara egokituz lan egitea?
Zailtasun handiena protokoloak ezarritako arauak betetzea da, baina igerilekuko bestelako arauekin ez dugu arazorik izan. Jendea errespetuz ari da jokatzen, eta egoera honen aurrean jarrera egokia hartu dute.
Jendea oraindik ere joaten al da igerilekura? Ala uda honetan beste leku batzuk nahiago izan dituzte? Hondartza, errekak…
Inoiz baino jende gehiago ari da etortzen igerilekura aurreko urteekin alderatuta. Asteburuan hondartzara joaten direla nabaritu dugu, baina astean zehar gehiengo handi bat igerilekura etortzen da. Ia 1000 pertsona etorri diren egunak izan ditugu, gehienezko edukierara iritsiz. Abuztuan oraindik jende gehiago etortzea espero dugu, jende asko aurten ez delako oporretara joango.
Zein dira protokolo honetan aplikatzen diren neurriak? Igerilekura joateko txanda eskatu behar da?
Ordutegia berdina da, baina gehienezko edukiera %60ra murriztu digute, gure kasuan 1011 pertsona dira. Protokolo bat daukagu bero handia aurreikusten den egunetarako. Kasu honetan, txanda hartu beharko litzateke igerilekura etortzeko. Hala ere, gaur-gaurkoz ez zaigu egokitu eguerdian jendea etxera bidali behar izatea arratsaldeko txandakoak sartzeko. Eguerdiko 15:00etan 1000 pertsonetara iritsiko bagina, goizeko txandakoak bidali beharko genituzke arratsaldekoak sartu ahal izateko, baina esan bezala inoiz ez gara puntu horretaraino iritsi.
Jendea honezkero ohitu al da neurrietara?
Esango nuke baietz, eta gainera geroz eta hobeto ari dira. Hala ere betikoa errepikatu beharra izaten dugu: musukoak jartzeko, distantziak mantentzeko… Horrez gain, noizbehinka megafonoetatik oharpenak jartzen ditugu jendeari neurriak gogorarazteko. Baina oro har jendea oso formal dabil.
Guzti hau alde batera utzita, zer moduz doa aurtengo urtea? Ezustekorik izan al duzue?
Arraroa dirudien arren, inoiz baino lasaiagoa izaten ari da urte hau. Botikinean hiruzpalau pertsona egon gara zauri txiki eta ziztadekin, baina bestela gorabehera aldetik oso urte lasaia izaten ari da.
