LAB sindikatuak “irmoki” salatu ditu Urretxuko udalak kontratazio eta promozio prozesuetan “erabiltzen dituen legearen aurkako prozedurak”. Horra hor LABek komunikabideetara igorri duen idatzia.
“Aspalditik adierazi dugu gure desadostasuna kontratazio askotan meritu, gaitasun eta berdintasun printzipioak ez zirelako errespetatzen. Baina azkeneko kontratazioek marra gorri denak pasa dituzte. Kasu askotan udal gobernuak aurretiaz erabakitzen du lanpostua zeinentzat izango den.
Udalaren egiteko era honakoa izan da: Lehenik pertsona hoiekin prozesua abiatu baino lehen bildu izan da eta Lanbiden lanpostua azalduko dela aurreratzen zaie. Ondoren udalak Lanbiden ordu batzuk edo egun gutxiz jartzen du lanpostuaren esteka eta askotan Urretxuko webgunean agertu ere ez da egiten, gardentasun eta parte hartzearen aurka eginez. Jasotako curriculum gutxi horiekin udal gobernuak aukeratua zein den publiko egiten du, inolako hautaketa froga eta epaimahai objetiborik igaro gabe. Bukatzeko, prozesu horren promoziorako egindako propaganda oro ezabatzen da. Eta hau zergatik? Prozesuen iluntasuna ezkutatzeko? Udalerri gehienetan aldiz aurreko urtetan egindako prozesuen nondik norakoak daude webguneetan jarrita gardentasun eta meritu printzipioak errespetatuz.
Horrela egitea justifikatuta legoke premiazko kasu batean, baino ez da kasua, hemen lanpostu gehienak era horretara ebazten dira, horrek jokaera tipo bat, lan egiteko era bat azalarazi eta erakusten digu.
Horrek guztiak kontratazio prozesu simulatuak eratzen ditu eta prebarikaziotik gertu dauden prozedurak dira.
Maiz pertsona asko kontratazio prozesu horietatik kanpo gelditzen dira, batetik ohartzeko denborarik ere ez duelako ematen publizitate motz eta urri horrek, eta bestetik beraien burua aurkeztea lortuta ere aukeraketa aurretik eginda dagoelako. Horrela, herritarren gehiengoa udalean lan egiteko betatua dago.
Berriz diogu egiteko era horrek enplegu publikorako meritu, gaitasun eta berdintasun printzipioak erabat urratzen dituela eta legez kanpo dagoela. Jokaera horiek enpresa pribatuaren prozedurak dira eta Urretxuko Udalean ez dira onargarriak.
Argi utzi nahi dugu aukeratutako pertsona horien aurka ez dugula ezer, beraien profesionaltasun eta balioa ez dugula dudatan jartzen, justu kontrakoa. Horrelako prozesuek ez dute beraien izen ona zikindu behar eta udalak gauzak zuzen egin balitu ez ginateke egoera honetan egongo.
Era berean, beldur gara hurrengo brigadako langile eta euskara teknikari lanpostuen prozesuekin berdin jokatuko den, alkateak pribatuan adierazi duen bezala.
Bestetik, 2021ean berretsitako legearen arabera interinoek ezin dute 3 urte baino gehiago postu batean egon eta lanpostu horiek lan eskaintza publikora (OPEra) atera beharko lirateke. Urretxuko Udalak, epaimahaiak lortzea zaila dela argudiatuta, prozesu horien oinarriak ere ez ditu prestatzen, horrela interinitate eta prekarietatea gurean betikotuz. Egun, udalean interinitatea %62 ingurukoa da eta brigadan irailetik aurrera %83koa adibidez. Jokabide horrekin herritarrei postu horietara aurkeztu ahal izatea galerazten zaie eta legearen aurkako iruzur baten aurrean aurkitzen gara, postuan daudenak ere berau galtzeko arriskuan egonik.
Honekin guztiarekin, LAB informazio guztia jaso eta lan ikuskaritzan salaketa bat jartzea baloratzen ari da.
Azkenik LABek udal talde politikoei, ELA sindikatuari eta udal langileei eskatu nahi die egoeraren larritasuna barnera dezaten, ezin dugu hau normaltasunez hartu eta ezer gertatuko ez balitz bezala jokatu”.
