Urola Garaiko Mankomunitateak eskainiko du, Lanbideren erakunde laguntzaile denez. Sortzen zerbitzua arduratuko da ekintzaileak laguntzeaz. Izena ematea, maiatzaren 21era arte
Urola Garaiko Mankomunitatea Lanbideren erakunde laguntzaile izango da zortzigarren urtez, eta UGGASAko Urola Garaia Sortzen ekintzailetza zerbitzuaren bitartez, tutoretzak eskainiko dizkie herritarrei, enpresa proiektuak edota ideiak garatzeko. 2020ko ekitaldian Lanbideko Lan eta Gizarte Politikako Departamentuak pertsona ekintzaileei zuzenduriko diru laguntzen markoan kokatzen dira tutoretza saio horiek.
Sortzen zerbitzuak enpresa proiektu berriak aholkatu eta garatzeko laguntza eskainiko du, eta horretaz baliatzen diren ekintzaileek diru laguntzak jaso ahal izango dituzte, enpresa ideia bat garatzeko edo enpresa jarduera berriak martxan jartzeko.
Tutoretza saioak gutxienez bi hilabetez luzatuko dira ideiak garatzeko, eta hiru hilabetez enpresa martxan jartzeko. Prozesu osoan zehar, UGGASAren babesa eta aholkularitza jasoko dute ekintzaileek, eta UGGASAK haren baliabideak eta esperientzia jarriko ditu ekintzaleen eskura.
Tutoretza programa honetarako izena emateko azken eguna maiatzaren 21a da. Horretarako, Amaia Amenabar arduradunarekin jarri behar da harremanetan 943 72 58 31 zenbakian edo aamenabar@uggasa.eus helbidean.
43 lanpostu
Ekintzaileei zuzendutako tutoretza programa hau 2013tik eskaintzen du Urola Garaiko Mankomunitateak Sortzen zerbitzuaren bitartez, eta ordutik 2019ra arte garatu dituen bi prozesuetan 68 pertsonek hartu dute parte. Partaide guzti horietatik 43k haien lanpostu propioa sortu dute, euren negozio ideia aztertzeko, osatzeko eta finkatzeko laguntza jaso ondoren.
Orain arte egindako saioak taldeka egin dituzte, baina oraingoan, COVID-19aren eragina dela eta, banaka egingo dituzte.
