Atrakzio enpresak oso garai zaila pasatzen ari dira, lan egiten uzten ez dietelako. Urretxuko Udalak Hugo eta Eusebio enpresari baimena eman dio eta honek 150 sarrera oparitu dizkio esker ona azaltzeko.
Atrakzio enpresak oso gaizki ari dira pasatzen, festak bertan behera gelditu direlako. Gainera, udal gehienek ez diete lan egiteko baimena ematen. Urretxuko Udalak herriko Hugo eta Eusebio Atrakzioak enpresari lan egiteko baimena eman dio, ordea, bere ohe elastikoak eta txikiparka seguruak direla ziurtatu ondoren. Hugo eta Eusebio Atrakzioak enpresak 150 sarrera oparitu dizkio udalari, esker ona azaltzeko. Udalak, bere aldetik, kultura ere segurua dela aldarrikatu nahi du eta kultura kontsumitzen duten familiak saritu nahi ditu: sarrerak igande honetako ikuskizunera joango direnen eta liburutegiko erabiltzaileen artean banatuko ditu.
Bidegorriaren ondoan
Hugo eta Eusebio enpresaren ohe elastikoak eta txikiparka Areizaga kalean daude, bidegorriaren ondoan. Inguruko herrietan lan egiten dute, festarik festa, baina iaz festa guztiak bertan behera gelditu ziren eta ez zuten diru sarrerarik eduki.
Abenduan Urretxuko Udalari Areizaga kaleko plazatxoan lan egiteko baimena eskatu zioten eta udalak, segurtasun protokoloa betetzen zutela ziurtatu ondoren, baimena eman zien. «Denborak arrazoia eman digu. Hartu genuen erabakiari esker, Hugo eta Eusebio Atrakzioak enpresak lanean jarraitu ahal izan du. Enpresa hau herriko familia batena da eta lan egiteko aukera eduki dutenez, diru sarrerak izan dituzte. Gainera, atrakzioak seguruak direla erakutsi dugu: hilabete hauetan ez da kutsatzerik egon», azaldu dute udal ordezkariek.
Hala ere, oso gutxi dira oraindik atrakzio enpresei lan egiteko baimena eman dieten udalak. Hugo eta Eusebio enpresakoek Urretxuko Udalari eta familiei eskerrak eman nahi dizkiete eta horretarako 150 sarrera oparitu dizkiote udalari. Udalak kulturaren aldeko apustua egiten duten familiei oparituko dizkie.
120 sarrera igande honetako antzerki saiorako sarrerak erosten dituzten lehen 120entzat izango dira. Dabitxi zirkuak Makina eta ni ikuskizuna egingo du, 17:00etan, Labeaga aretoan. Sarrerak gaur, bihar eta etzi salduko dituzte Urretxuko kultur etxean: 11:00etatik 13:00etara eta 17:00etatik 19:00etara. Agortzen ez badira, igandean bertan ere salduko dituzte: 16:00etatik aurrera, Labeaga aretoan bertan.
Atrakzioetarako beste 30 sarrerak liburutegian liburu bat maileguan hartzen duten 10 urte azpikoen artean banatuko dituzte.