Ondarearen Europako Jardunaldiak direla eta, lau jarduera inklusibo antolatu ditu Urretxuko Udalak. Bi bisita gidatu, Escape Room bat eta familian jolasteko saioa izango dira.
Urretxuko Udalak lau jarduera inklusibo antolatu ditu, Ondarearen Europako Jardunaldien barne. Izan ere, Ondarearen Europako Jardunaldien seigarren edizioak irisgarritasunean jarri du arreta eta helburua ondarea herritar guztiei hurbiltzea da. Udalak bi bisita gidatu, Escape Room bat eta familian jolasteko arratsalde bat antolatu ditu.
Lehen jarduera gaur arratsaldean izango da. Parte hartzaileak 15:00etan elkartuko dira, Iparragirre plazan. Alde zaharrean egingo den bisita gidatu batean parte hartuko dute. Pedro Berriotxoa urretxuar irakasle, idazle eta ikertzaileak Iparragirreren eta XIX. mendeko gertakarien inguruan hitz egingo du. Bisita gurpildun aulkietako erabiltzaileentzat egokia izango da eta zeinu mintzairara itzuliko da, eskariaren arabera. Parte hartu nahi dutenek, erreserba egin behar dute. Horretarako, kultur etxera jo behar dute edo 943 03 80 88 zenbakira deitu. Parte hartzaile bakoitzak 3 euro ordaindu behar du.
Bigarren jarduera hilaren 15etik 17ra egingo dute, 10:00etatik 20:00etara, udaletxeko atarian. Nahi duten guztiek lan talde batek prestatutako Escape Room jokoan parte hartzeko aukera edukiko dute. Talde bakoitzak ordu bete izango du ondarearekin eta hainbat kolektiborekin zerikusia duten igarkizunak asmatzeko. Parte hartzeko 943 03 08 88 zenbakira deitu behar da. Banaka, binaka, hirunaka edo launaka eman daiteke izena, baina seinaka jokatuko dute. Hala, taldeen aniztasuna bermatuko da (eta aniztasunari esker enigmak argitzea errazagoa izango da).
Hilaren 26rako bisita gidatu bat antolatu dute. Ondare industrialari eta trenari buruzkoa izango da. 15:00etan abiatuko dira, Areizaga-Kalebarren plazatik. Bukatzeko, hilaren 31n, 16:30ean Pagoeta plazan, belaunaldi ezberdinetako bizilagunek garai bateko jokoak egingo dituzte. Azken bi jarduera hauetan parte hartzeko ere 943 03 80 88 zenbakira deitu behar da.
