Lehen kanporaketa bihar jokatuko da, 22:30ean Apatxe tabernan. Zortzi hirukotek parte hartuko dute. Apirilaren 8an, Korrika herritik igaroko den egunean, bertso poteoa egingo dute
Bihar Martxoan Bertsoa ekimeneko 20. edizioa hasiko da. Nobedade nagusia taldekako txapelketaren itzulera da.
Taldekako txapelketaren azken edizioa 2018an egin zen. Ordutik, hainbat arrazoi medio, ezin izan da egin. Aurtengo txapelketan zortzi hirukotek eman dute izena.
Lehen kanporaketa bihar jokatuko da Apatxe tabernan. Tapia ta Leturias eta Txomin Stones taldeek neurtuko dituzte indarrak. Bigarren kanporaketa Fox tabernan izango da, hilaren 11n. Bertso Olariak, Bandolerok eta Diaspora taldeek parte hartuko dute. Hirugarren kanporaketa hilaren 18an izango da, Motz tabernan. Xaguxar Zopa, Zubiri-zubiri nongori-nongori eta Kostata taldeek parte hartuko dute. Saio bakoitzeko irabazlea hilaren 25ean gaztetxean jokatuko den finalera sailkatuko da. Saio guztiak 22:30ean izango dira.
Aurtengo edizioko azken ekitaldiak apirilean eta maiatzean izango dira. Apirilaren 8an Korrika Urretxutik eta Zumarragatik pasako da eta egun horretarako bertso-poteoa antolatu dute. 19:00etan hasiko da, gaztetxean. Beñat Torres, Maialen Akizu eta Mikel Iturriotzek parte hartuko dute. Bukatzeko, maiatzaren 14an antzerkia egongo da Urretxuko Labeaga aretoan. 19:00etan izango da. Aurtengo edizioaren kartela Maddi Iraetak egin du.
Bertso eskola irekiak
20. ediziora heldu izana ospatzekoa da, urtero lan handia egin behar baita eta bi herriotan zaletasun handia dagoela esan nahi baitu. «Ez da erraza horrelako egitaraua osatzea. Bertso-poteo bat antolatzeak, edo kanpotik ikuskizun bat ekartzeak, ez du neke handirik suposatzen. Taldekako txapelketa antolatzea, ordea, beste gauza bat da. Jendea animatu egin behar da, eta animatzeko seguru sentitu behar du, gai dela eta gustura egingo duela pentsatu. Hori dela eta, bertso eskola irekiak antolatu ditugu urtarrila hasieratik, txapelketan aritu nahi zuen orok bertsotan aritzeko aukera izan zezan. Pozik gaude, eskola horiek beren emaitza izan dutelako. Horren isla da aurtengo taldekako txapelketan arituko garen 24 parte hartzailetik 9 aurrez sekula kantatu gabeak izatea», esan du Torresek.
Antolatzaileek txapelketaren kutsu herrikoia azpimarratu dute. «Bere sorreratik, gu oraindik umeak ginela, zerbait berezia izan du Martxoan Bertsoak. Ez da urruneko oholtza batean egiten den ohiko txapelketa bat, lehiatik gutxi duen adierazpen herrikoi bat baizik. Jendea gustura joaten da entzutera, kantuan dagoena bere laguna, arreba edo ezagunen bat delako», azaldu du Iturriotzek.
Nahiz eta pandemiaren agerpenak erabat baldintzatu, bertso eskola ez da geldirik egon azken urteotan. Urtero antolatu dute Martxoan Bertsoa zikloa. Horrez gain, pandemian zehar Etxetikan Korrozka bertso katea antolatu zuten: 100 herritarrek baino gehiagok parte hartu zuten. Era berean, bi astean behin Otamotz atari digitalean bertso sortak igotzen dituzte. Dagoeneko, 29 herritarrek igo dituzte beraien bertso sortak eta guztiak daude entzungai.
