Duela 14 urte, 2008an, Zuzen Korta eta Maialen Eguren zumarragarrak Cadizeko (Andaluzia, Espainia) Barbate herrira joan ziren oporretara. El Abuelo landetxean hartu zuten ostatu. Herria gustatu egin zitzaienez eta landetxekoekin harreman ona egin zutenez, ordutik ia urtero joan dira bertara. Etxekoak dira jada. Hala, landetxeko terraza bati El Rincon de Zumarraga izena jarri diote.
Jendearen gomendioa jarraituz erabaki zuten Cadizera joatea. «Mundu guztiak Cadiz oso polita dela esaten zigun. Ez genuen ezagutzen eta Internet bidez txakurrak onartzen zituzten tokiak bilatu genituen. Nire aitak landetxe hau aurkitu zuen eta, prezioa oso ona zela iruditu zitzaigunez, hara joan ginen: nire gurasoak, Zuzen, Deabru txakurra eta ni», azaldu du Egurenek.
Asko gustatu zitzaien. «Hainbat etxetxo daude. Animaliak ere badituzte: oiloak, ardiak, txakurrak, katuak, asto bat, pauma bat, antzarak… Oso toki atsegina da. Bezero gehienak andaluziarrak dira, baina Valladolidekoak, madrildarrak eta euskaldunak ere joaten gara. Aurten, Villabona, Bilbo, Gasteiz eta Iruñeko jendearekin elkartu gara», aipatu dute.
Gainontzeko euskaldunak txundituta gelditu dira El Rincon de Zumarraga dion egurrezko taila ikusi dutenean. «Jabeen senitartekoak ginela uste zuten. Izan ere, bertako tabernan jabeekin esertzen gara. Gainera, Ametsek (beraien seme nagusiak) abuelo Juan eta abuela Candi deitzen die landetxeko jabeei», azaldu dute.
Oso harreman estua dute beraiekin, 2008tik ia urtero joan baitira El Abuelo landetxera. «Bi urtetan bakarrik kale egin dugu, Amets eta Galder semeak jaio ziren urteetan». Haurrak ere oso gustura joaten dira. «Amets oso gustura egoten da. Aske. Izan ere, ez dago autoen arriskurik. Gainera, igerilekua eta futbol zelai txiki bat dute».
Baita El Rincon de Zumarraga izeneko terraza ere. «Tabernaz gain, El Salon deitzen dioten eraikuntza dute. Nagusiari kanpoan bi edo hiru mahai jartzea proposatu nion, oso toki polita baita. Hurrengo goizerako jarri zituen. Terrazari izen bat jarri beharko ziela esan zidan. Izan ere, kale eta etxe guztiek izena dute. Guztiek hango zuhaitzen eta landareen izenak dituzte. Terrazari El Rincon de Zumarraga izena jartzea proposatu zidan. Izen hori jartzen bazion, egurrezko taila bat eramango genuela esan genion. Hurrengo urtean egurrezko taila eraman genuen, lauburu eta guzti», azaldu du Egurenek.
Kortak eta Egurenek asko hitz egin diete Zumarragari buruz El Abueloko nagusiei, baina oraindik ez dira etorri. «Arantza hori dute sartuta. Gure ezkontzara gonbidatu genituen, baina ezin izan zuten etorri: ekainean ezkondu ginen eta urteko sasoi horretan lan handia izaten dute. Datorren urteko martxoan etorriko dira, Cadizek Realaren aurka jokatuko duten partida ikustera».
Guztiak futbol zaleak dira. «Behin baino gehiagotan joan gara Cadiz hirira, Cadizen eta Realaren aurkako partida ikustera. Juanen eta Candiren semeak lortzen dizkigu sarrerak, Brigadas Amarillas Cadizen lagun-taldeko kidea baita. Realak Lehen Mailara igotzea lortu zuen urtean, han izan ginen. Aurten abuztuan jokatu dute eta partida ikustera joan gara».
Aurrerantzean ere ez dute kale egingo. «Barbate toki zoragarria da: Zahara de los Atunes, Caños de Meca, Zahorako hondartza… dena Barbate da. Vejer herria ondoan dago eta hori ere oso polita da. Gainera, landetxean lasaitasun handia dugu».
