Euskal Herriko Bertso Txapelketa Nagusia badoa aurrera eta saioak pasa ahala final handian nor egongo den jakiteko pausuak emanez doaz. Atzokoan Lizarran izan zuten saioa. Bertan, Aitor Bizkarra, Asier Azpiroz, Imanol Uria, Unai Gaztelumendi, Iñigo Mantzizidor “Mantxi”eta Maialen Akizu urretxuarra izan ziren. Akizu hirugarren postuan gelditu zen 658.50 punturekin eta ez zuen finalerdietara sailkatzea lortu. Finalerdietan bi goierritar arituko dira: Nerea Elustondo legazpiarra eta Iñaki Apalategi beasaindarra. Nerea Ibartzabal markinarra, Fina Salegi urretxuarraren alaba, finalerdietara sailkatu da.
Akizuk hirugarren postua eskuratu zuen atzo, 658.50 punturekin. Hasierako agurraren ondoren, 8ko nagusian aritu zen Akizu, Aitor Bizkarrarekin batera unibertsitateko ikasle paperean. Ondoren, Imanol Uria izan zuen lagun 8ko txikian abesteko. Kasu honetan, lagun arteko elkarrizketa bat izan zuten hizpide. Jarraian, bakarka aritu zen urretxuarra, puntuei erantzunez, gaitzat jolasa izanik. 10eko txikian aritzeko Unai Gaztelumendi izan zuen ondoan, txanda horretan ere lagun paperean. Amaitzerako agurraren aurretik bakarkako txanda izan zuen Akizuk, “Zure egoera orain arte ezkutuan mantendu duzu. Gaur, laguntza eskatu beharrean zaude.” gaipean.
Puntuazioei dagokienean horrela gelditu zen atzoko puntuazio taula, Aitor Bizkarra lehen postuan, Asier Azpiroz bigarrenean eta Maialen Akizu hirugarrenean izanik:
Puntuazio Taula
| 8ko handia | 8ko txikia | puntu-eran | 10eko txikia | ganbara | Guztira | |
|---|---|---|---|---|---|---|
| Aitor Bizkarra | 138.00 | 128.50 | 142.50 | 140.00 | 144.50 | 693.50 |
| Asier Azpiroz | 131.00 | 135.50 | 136.50 | 132.00 | 131.00 | 666.00 |
| Maialen Akizu | 122.50 | 133.50 | 141.50 | 142.00 | 119.00 | 658.50 |
| Imanol Uria | 129.00 | 133.50 | 129.50 | 133.50 | 126.50 | 652.00 |
| Unai Gaztelumendi | 117.00 | 129.00 | 121.50 | 133.00 | 130.00 | 630.50 |
| Iñigo Mantzizidor ‘Mantxi’ | 127.50 | 122.00 | 120.00 | 132.00 | 121.00 | 622.50 |
