Udalerriko aberastasuna banatu eta desberdintasun sozialak murrizteko, tasa sistema progresiboa diseinatu du Zumarragako EH Bilduk
Udalerriko aberastasuna banatu eta desberdintasun sozialak murrizteko, tasa sistema progresiboa diseinatu du Zumarragako EH Bildu. Hobariak herritarren %70era iritsiko lirateke. Emakumeen %60ak, gizonen %25ak eta 25 urtetik beherakoen %80ak doan izan lezake sarbidea udaleko zerbitzuetara. %100, %50 eta %25eko hobariak ezarriko lirateko errentaren arabera.
Hobariak kiroldegiko bazkidetzan, Zelai Ariztiko ikastaro eta tailerretan, udalekuetan, Udal Euskaltegian, helduentzako eskolan, musika eskolan, UGLEko moduluetan eta eskola kirolean ezarriko lirateke.
Emakumeengan, gazteengan, egoera zaurgarrian dauden herritarrengan, pentsio baxuak dituztenengan eta goiko auzoetan bizi diren herritarrengan izango luke inpaktu handiena, errenta baxuenak dituztenak direlako.
Uraren tasa %50ean bonifikatuko litzateke kontsumo maila baxuetan eta herritarren %100ari eragingo lioke.
Proposamena Errenteria eta Usurbil bezalako herrietan martxan dago. “Beraz, egingarria eta bideragarria da. Koiuntura sozio-ekonomikoak eskatzen duen anbizio soziala du eta urgentziarekin egiten dugu proposamena, gure bizilagunen gehiengoaren ongizatea hobetzeko”.
Zumarragako EH Bilduk bizi dugun egoeraren azterketa egin du. “Desberdintasun sozialak areagotzen ari dira eta inflazioaren gorakadari, Zumarragan ura %40 garestiago ordaintzen dugula gehitu behar zaio. Gainera Zumarragako egoera sozio-ekonomikoa Goierri, Gipuzkoa eta EAEkoa baino okerragoa da. Gipuzkoan langabezi-tasa handienetakoa duen herria gara (Gipuzkoan hiru herri bakarrik daude gure atzetik) eta, EUSTAT eta Lanbideko datuekin egin dugun azterketaren arabera, 25 urtetik beherako gazteen %80ak Zumarragako bataz bestekotik behera irabazten du, emakumeen %50 pobrezia-tasetatik behera dago eta goiko auzoetako bataz besteko errenta erdialdekoa baino %30 baxuagoa da”.
Udalaren egoera ekonomikoa ez dela ona gehitu dute. “Errealitate objetiboa da gure udalak gihar ekonomiko mugatua duela diru sarrera arruntak lortzeko. Izan ere, foru funtsarekiko dependentzia handia dugu eta azken urtean egin diren inbertsioak zorpetzearekin egin dira. Beraz, neurriak hartzen ez badira, egoera kezkagarrian aurki gaitezke epe ertainean”.
Egoera hobetzeko, udala ekonomikoki indartu, zerbitzu publikoak sendotu eta aberastasuna banatu behar dela gehitu dute. “Udala indartu behar dugu, desberdintasun sozialak murriztu eta gure ongizatea hobetzeko”.
Horri aurre egiteko hiru neurri proposatu dituzte.
-Progresibitatea eta aberastasunaren banaketa: udalak eskaintzen dituen zerbitzu eta tasetan hobari-sistema progresiboa martxan jartzea, eta udalak zuzenki parte hartzen, baina zuzenki kudeatzen ez duen zerbitzuetan laguntza sistema jartzea. Hau da: kiroldegiko bazkidetza, Zelai Ariztiko ikastaroak eta tailerrak, udalekuak, Udal Euskaltegia, helduentzako eskola, musika eskola, UGLEko modulu profesionalak eta eskola kirola. %100, %50 eta %25eko hobariak ezarriko lirateke errentaren arabera.
14.875 euroko errenta mailatik (emakumeen batez besteko errenta Zumarragan) behera dauden herritar guztiek doan izango dute sarbidea, 21.257 euro errenta mailaren batez bestekotik behera daudenak %50eko hobaria eta herritarren %70ak irabazten duen errenta-mailatik behera dutenak (28.859 euro) %25eko hobaria.
Familia-unitate batean bizi diren eta errentarik ez duten haur eta gazteei dagokionez, familiaren errenta hartuko da aintzat eta errenta-kopuruak. Adibidez, bi errenta dauden bizi-unitateetan 19.534 eurotik behera doan izango dute, 28.139 eurotik behera %50eko hobaria eta 36.756 eurotik behera %25eko hobariak izango dituzte.
RGIa eta AESa jasotzen duten herritar guztiek doan izango dituzte aipatutako zerbitzu guztiak. Orotara, 300 bizilagunek.
-Uraren prezio justuak: uraren tasen %50ean lagunduko da 9 metro kubiko azpiko kontsumoa. Hau da, kontsumo baxuetan.
-Udala eta zerbitzu publikoak indartu: aurten udaleko tasak eta prezio publikoak %1,5 igotzea. Ezin dugu permititu udala ahultzea, horrek zerbitzu sozial okerragoak eta epe ertainera inbertsio falta ekarriko duelako. Udala indartu behar da zerbitzu publiko hobeak izateko eta aberastasuna banatzeko.
EH Bilduk “inpaktu eta dimentsio sozial handiko neurriak” direla dio.
-Emakumeen %80ak jaso ahal izango lituze hobariak eta emakumeen %60k doan izango luke sarbidea udaleko zerbitzu horietara. Gizonen %50ak hobariak izan ahalko lituzke eta %25ak doan izango du sarbidea.
-Errenta jasotzen duten 25 urtetik beherako gazteen %80ak izango luke doako sarbidea eta ia guztiek hobariren bat.
-Diru-sarrerarik gabeko seme-alabak dituzten familien %50k hobariak jaso ahalko lituzkete eta %30k doan izango lukete sarbidea beren seme-alabentzat.
-Egoera zaurgarrienean dauden herritarrek doan izango lituzteke zerbitzuak, hau da, RGIa eta AESak jasotzen duten herritarrek.
-Eitza eta goiko auzoetako herritarrak izango lirateke onuradun handienak errenta-maila baxuena dutelako. Adibidez, bertan bizi diren herritarren %75ak hobariak jaso ahal izango lituzke eta %30ak doako sarbidea izango luke aipatutako udal zerbitzuetara.